पुणे : बावधन येथील सुर्यदत्ता ग्रुप ऑफ इन्स्टिट्यूटमध्ये नॅशनल इन्स्टिट्यूट ऑफ पर्सोनल मॅनेजमेंटच्या (एनआयपीएम) स्टुडन्ट चॅप्टरची स्थापना करण्यात आली आहे. त्यामुळे संस्थेतील विद्यार्थ्यांना राष्ट्रीय-आंतरराष्ट्रीय स्तरावरील ’एचआर’कडून मार्गदर्शन मिळणार आहे. या चॅप्टरचे उद्घाटन आणि सामंजस्य करार नुकताच संस्थेच्या बावधन कॅम्पसमध्ये पार पडला.
‘एनआयपीएम’ ही भारतभरातील मनुष्यबळ व्यवस्थापकांची संस्था असून, त्यामध्ये मनुष्यबळ व्यवस्थापन (एचआर), औद्योगिक संबंध (इंडस्ट्री रिलेशन्स), मनुष्यबळ कल्याण आणि प्रशिक्षण व विकास याचा समावेश आहे. ‘एनआयपीएम’कडून ‘एचआर’मधील विविध प्रकारचे प्रशिक्षण आणि समुपदेशन कार्यक्रम, कार्यशाळा, परिसंवाद, परिषदा आणि प्रमाणपत्र अभ्यासक्रम राबविले जातात.
यावेळी स्ट्रॅटेजिक फोरसाईट ग्रुपचे सचिन ईटकर, ‘एनआयपीएम’चे डॉ. अजय कुलकर्णी, डॉ. अमित गिरी, डॉ. पवन शर्मा उपस्थित होते. एमर्सन प्रोसेस मॅनेजमेंटच्या वरिष्ठ व्यवस्थापक (एचआर) हेमांगी धोकटे यांनी विद्यार्थ्यांना मार्गदर्शन केले. तसेच एनआयपीएमच्या ‘मेंटॉर-मेंटी’ उपक्रमाविषयी माहिती दिली. डॉ. राजेंद्र सबनीस यांनी राष्ट्रीय विद्यार्थी परिषदेची माहिती दिली. सूर्यदत्ताच्या बीबीए, एमबीए व पीजीडीएमच्या विद्यार्थ्यांना व शिक्षकांना या स्टुडंट चॅप्टरचे सभासदत्व संस्थेतर्फे देण्यात येणार असल्याचे डॉ. संजय चोरडिया यांनी सांगितले.
उद्योग आणि शिक्षण यांच्यातील संबंध दृढ करण्यासाठी सुर्यदत्ता शिक्षण संस्थेचा नेहमी प्रयत्न राहिला आहे. विद्यार्थ्यांना औद्योगिक जगताचे ज्ञान शिकत असतानाच व्हावे, या उद्देशाने एनआयपीएमच्या स्टुडंट चॅप्टरची सुरुवात करण्यात आली आहे. या दोन संस्थातील सामंजस्य करारामुळे विद्यार्थी आणि शिक्षकांना फायदा होईल, तसेच उद्योग क्षेत्रातील गरजांचा प्रत्यक्ष अनुभव घेण्याची संधी मिळेल, असे मत सुर्यदत्ता ग्रुप ऑफ इन्स्टिट्यूटचे संस्थापक अध्यक्ष डॉ. संजय चोरडिया यांनी व्यक्त केले. संस्थेचे मुख्य कार्यकारी अधिकारी डॉ. शैलेश कासंडे यांनी स्वागत-प्रास्ताविक केले.