पुणे- महापालिकेच्या स्थायी समिती मध्ये काही वादग्रस्त टेंडरच्या विषयांवर मतदान करताना राष्ट्रवादीचे कोण कोण सदस्य चुकीचे वागले याची आम्ही शहानिशा करू असे येथे राज्याचे उपमुख्यमंत्री राष्ट्रवादीचे नेते अजित पवार यांनी म्हटले आहे.मात्र राष्ट्रवादीचे शहराध्यक्ष जी भूमिका घेतात ती सर्वांना विश्वासात घेऊनच घेतात . त्यांची भूमिका हीच पक्षाची भूमिका असते असेही त्यांनी स्पष्ट केले.
या शिवाय बोलताना ते म्हणाले,’ गणेशोत्सवाच्या पार्श्वभूमीवर पुणे शहारत कुठलेही नवे निर्बंध लावणार नाही. मात्र गणेशोत्सवाच्या पहिल्या दिवशी अंदाज घेऊन जर गर्दी होते असं लक्षात आल्यास दुसऱ्या दिवसापासून लागलीच कठोर निर्बंध लावण्यात येतील. पुण्यात कोरोना आढाव बैठकीनंर ते प्रसारमाध्यमांशी बोलत होते.राज्यात ग्रामीण भागात कोरोना नसल्यासारखं नागरिक वागू लागले आहेत. त्यांनी काळजी घेणं गरजेचं असल्याचंही पवार यावेळी म्हणाले आहेत. लसीकरणात महाराष्ट्र अग्रेसर आहे. पण अजून अनेक नागरिकांचे लसीकरण झाले नाही. राज्याकडून जास्तीत जास्त लसीकरण वाढवण्यावर भर दिला जात असल्याचं ते यावेळी म्हणाले आहेत.
इंधन दरवाढीबाबत केंद्रावर टीका
दहा महिन्यापासून राजधानी दिल्लीमध्ये शेतकऱ्यांचं आंदोलन सुरु आहे. मात्र, मोदी सरकारकडून याची कोणतीही दखल घेतली जात नाही. हे जनतेचं दुर्दैव आहे. अशी टीका करतानाच इंधन दरवाढीवरुन अजित पवार यांनी मोदी सरकारला खडे बोल सुनावले. कोरोनामुळे त्रस्त झालेल्या नागरिकांना इंधन दरवाढीचा फटका बसत आहे. ते नियंत्रित करण्यासाठी केंद्राकडून कोणतीही उपाययोजना केली जात नाही, असी टीका अजित पवार यांनी केली.
तिसऱ्या लाटेचा धोका लक्षात घेऊनच शाळा सुरु करण्याबाबतचा निर्णय
तिसऱ्या लाटेचा सामना करण्यासाठी राज्य सरकार तयार आहे. सर्व उपाययोजना करण्यात येत आहेत. तिसऱ्या लाटेत लहान मुलांना आधिक धोका असवल्याचं तज्ज्ञांनी सांगितलं आहे. त्यानुसार तयारी केली जात आहे. तिसऱ्या लाटेचा धोका लक्षात घेऊनच शाळा सुरु करण्याबाबतचा निर्णय घेतला जाईल, असेही अजित पवार यांनी यावेळी सांगितलं.
