मुंबई-सत्ता आल्यावर भाजपचा उदोउदो करणाऱ्या बॉलीवूड मधील जैकी श्रॉफच्या मुलासाठी सुप्रसिद्ध शास्त्रीय गायक राहुल देशपांडे यांचा भाजपने अपमान केला आहे, असा आरोप शिवसेनेच्या ठाकरे गटाचे नेते सचिन अहीर यांनी केला आहे.भाजपने वरळी येथे आयोजित केलेल्या दीपोत्सवाच्या कार्यक्रमात हा प्रकार घडला. विशेष म्हणजे या कार्यक्रमाचा हा प्रसंग सांगणारा व्हिडीओही तितकाच बोलका आहे.
भाजपच्या वतीने वरळीतल्या जांबोरी मैदानावर दीपोत्सव कार्यक्रमाचे आयोजन करण्यात आले होते. या कार्यक्रमात प्रसिद्ध शास्त्रीय गायक राहुल देशपांडे यांचे गाणे ठेवण्यात आले होते. कार्यक्रम सुरू झाला. मात्र, तितक्यात प्रसिद्ध अभिनेता टायगर श्रॉफ आला. यावेळी त्याचा सत्कार करण्यात आला. आता त्यावरून ठाकरे शिवसेनेने भाजपला लक्ष्य केले आहे.टायगर श्रॉफ कार्यक्रमात आला. व्हिडीओमध्ये तो भाजप नेत्यांसोबत स्टेजवर आलेला दिसतो. यावेळी राहुल देशपांडे यांचे गाणे थांबलेले असते. ते म्हणतात, तुम्ही वीस मिनिटे थांबा. त्यानंतर सत्कार करा. हे बोलून मिनिटही झालेला नसतो. मात्र, तितक्यात स्टेजवरच्या दुसऱ्या बाजूला टायगर श्रॉफचा सत्कार करण्यात येतो.
शिवसेनेच्या ठाकरे गटाचे नेते सचिन अहीर यांनी या साऱ्या प्रकरणारवर व्हिडीओ पोस्ट करून एक ट्विट केले आहे. त्यात ते म्हणतात की, हाच का मराठी कलाकारांचा सन्मान….!!!! भाजपने आयोजित केलेल्या वरळीतल्या जांबोरी मैदानावरी दीपोत्सवात मराठी कलाकारांची चेष्टा केली, असा उल्लेख त्यांनी केला आहे.
