बाणेर-बालेवाडी प्रलंबित कामे मार्गी लावा ! पालकमंत्री पाटील यांचे महापालिकेस पत्र; अमोल बालवडकर यांचा पाठपुरावा
पुणे- महापालिकेत प्रस्थापितांची ‘लॉबी’ करून एककल्ली कारभार करतात असा सात्यत्याने ज्यांच्यावर आरोप होत आला आहे त्या आयुक्त विक्रमकुमार यांच्याबद्दल प्रशासनामध्ये प्रचंड असंतोष पसरला असताना आता भाजपचे नगरसेवक अमोल बालवडकर यांचीही सातत्याने आपल्या भागातील कामाबाबतची तक्रार पालकमंत्री यांच्याकडे जाऊ लागल्याने ,’कामात हयगय करू नका,आणि वारंवार सांगायला लावणे बरे नाही’असे पालकमंत्र्यांनी महापालिका आयुक्तांना सुनावल्याचे वृत्त महापालिकेच्या वर्तुळात पसरले आहे.बालवडकर यांनी गेली ५/६ वर्षे सातत्याने आपल्या भागातील समस्यांचा पाठपुरावा केला असताना,मध्यंतरी त्यांनी आंदोलनात्मक पवित्राही घेतला असताना आयुक्तांनी त्यांच्या भागास भेट दिली व आश्वासनही दिले होते मात्र ते राजकीय आश्वासन ठरल्याचे समजते आहे.
दरम्यान याबाबतची माहिती अशी आहे कि,’ औंध -बाणेर-बालेवाडी भागात समान पाणी योजनेचे काम पूर्ण होण्यासाठी आवश्यक असलेल्या ट्रान्समिशन जलवाहिन्यांची कामे काही भागात अपूर्ण अवस्थेत आहेत ही कामे तातडीने पूर्ण करण्याचे पत्र पालकमंत्री चंद्रकांत पाटील यांनी महापालिकेस दिले आहे.याबाबत भाजपचे माजी नगरसेवक अमोल बालवडकर यांनी या कामाच्या सद्यस्थितीची माहिती पालकमंत्री पाटील यांना पत्राद्वारे कळविली होती, त्याची गंभीर दखल घेत महापालिकेस याबाबतचे आदेश पालकमंत्री पाटील यांनी दिले आहेत.
बाणेर-बालेवाडी-पाषाण भागामध्ये समान पाणी पुरवठा योजनेचे काम अंतिम टप्प्यात आले आहे. बाणेर-बालेवाडी-पाषाण भागातील 8 पैकी 6 पाणी टाक्यांचे काम पूर्ण झाले असून लवकरच त्या देखील सुरू करण्यात येतील.परंतु, या टाक्यांना ट्रान्समिशन लाइनमधून पाणी पुरवठा करण्यात येणार आहे. त्या लाइनचे काम आपण केलेल्या सूचनेनुसार पुन्हा सुरू करण्यात आलेले आहे. वारजे ते बाणेर-बालेवाडी पर्यंतच्या भागामध्ये या ट्रान्स्मिशन लाईनचे काम अनेक ठिकाणी अपूर्ण अवस्थेमध्ये आहे. तसेच,या पाणी टाक्यांच्या अंतिम टप्प्यामधील काही कामे देखील प्रलंबित आहेत. या कामांबाबत आपण स्वतः लक्ष घालून योग्य ती कारवाई करावी, अशी मागणी अमोल बालवडकर यांनी पालकमंत्री चंद्रकांत पाटील यांच्याकडे केली होती, त्यानुसार सदर प्रलंबित कामे तातडीने पूर्ण करण्याकरिता तातडीने उपाय योजना करण्यास सांगावे, असे आदेश पालकमंत्री पाटील यांनी आयुक्त विक्रम कुमार यांना दिले आहेत.
ही कामे प्रलंबित…
– डुक्कर खिंड वारजे महामार्ग परवानगीसाठी 250 मीटर जलवाहीनीचे काम
- वारजे येथे 36 मीटर जलवाहीनीचे काम
चांदणी चौक येथे एका खासगी जागेतून जाणाऱ्या 60 मीटर काम
एचइएमआरएल रामनदीवरील स्ट्रक्चरल स्टील ब्रीजमुळे ट्रान्समिशन लाइन
पाषाण तलाव येथ स्ट्रक्चरल स्टील ब्रीज 40 मीटर काम
सुस खिंड ते कुमार पेपीलोन सोसायटी पर्यंतचे सुमारे 800 काम
सुतारवाडी गावठाण येथे सुमारे 150 मीटरचे काम
सुस खिंड पूल ते किया शोरूम, बालेवाडी डेपो पर्यंत जलवाहिनी टाकण्याचे काम
