मुंबई- माजी विरोधीपक्षनेते राधाकृष्ण विखे-पाटील यांनी विधानसभा सदस्याचा राजीनामा दिल्याने रिक्त झालेल्या विधानसभेच्या विरोधी पक्षनेतेपदी काँग्रेसने गटनेते विजय वडेट्टीवार यांची नियुक्ती केली. विधानसभा अध्यक्ष हरिभाऊ बागडे यांनी विधानसभेत ही घोषणा केली. विजय वड्डेटीवार यांची विरोधी पक्षनेतेपदी निवड जाहीर करताच माजी विरोधी पक्षनेते आणि आताचे गृहनिर्माण मंत्री राधाकृष्ण विखे पाटील यांनी वड्डेटीवार यांच्या जागेवर जाऊन त्यांच्याशी हस्तांदोलन करून अभिनंदन केले.
लोकसभा निवडणुकीत राज्यात काँग्रेसला मोठा धक्का बसला, काँग्रेसने 48 पैकी फक्त 1 जागा जिंकली असून ती जागा चंद्रपूरची आहे. चंद्रपूरचे असलेले वड्डेटीवार यांनी या जागेसाठी प्रचंड मेहनत घेतली होती. आक्रमक स्वभावाचे वड्डेटीवार हे विधानसभेतही विविध मुद्यांवर आक्रमक असतात. त्यामुळे काँग्रेसने विखे यांच्यानंतर वड्डेटीवर यांची विरोधी पक्षनेतेपदावर नियुक्ती करावी असे पत्र हे अधिवेशन सुरू होण्यापूर्वीच विधानसभा अध्यक्षांना दिले होते.
अधिवेशन सुरू होऊन एक आठवडा उलटल्यानंतर त्यांनी विरोधी पक्षनेतेपदावर निवड जाहीर करण्यात आली आहे. आता अधिवेशनाच्या कामकाजाचे केवळ 7 दिवस शिल्लक असून हे या सरकारमधील शेवटचे अधिवेशन आहे. मुख्यमंत्री देवेंद्र फडणवीस यांनीही वड्डेटीवर यांचे अभिनंतद केले. यावेळी मुख्यमंत्री म्हणाले की, मुख्यमंत्री विदर्भातील आहेत आणि विरोधी पक्षनेताही विदर्भातील झाला आहे. विदर्भाच्या विकासासाठी ही महत्त्वाची गोष्ट आहे. मी चंद्रपूर जिल्ह्य़ातील आहे. विरोधी पक्षनेतेही चंद्रपूर जिल्ह्यातील आहेत. निवडणुकीच्या तोंडावर काँग्रेस पक्षाने वड्डेटीवारांना संधी दिली आहे. विधानसभा निवडणुकीनंतर विरोधी पक्षनेतेपद पुन्हा तुमच्याकडेच राहणार आहे, त्यामुळे पुढेही त्यांना संधी द्या अशी मनापासून विनंती आहे, असे सांगत मुख्यमंत्र्यांनी विरोधकांना टोमणा मारला.
