पुणे-भाजपचे प्रदेशाध्यक्ष ,पुण्याचे पालकमंत्री चंद्रकांतदादा पाटील यांना पुण्यातील कोथरूड विधानसभा मतदार संघाची उमेदवारी मिळाल्यानंतर एकीकडे त्यांना ‘बाहेरचा ‘ उमेदवार म्हणून फ्लेक्स फलक बाजीने विरोध होत असताना दुसरीकडे आज सायंकाळी 4 वाजता त्यांनी कोथरूड मध्ये भेटी गाठी घेत आपल्या प्रचारास प्रारंभ केला आहे.
प्रथम त्यांनी पंडित शौनक अभिषेकी यांच्या घरी जाऊन त्यांची सदिच्छा भेट घेतली.प्रसिद्ध गायक शौनक अभिषेकी,राष्ट्रीय स्वयंसेवक संघाचे महानगर संघचालक रवींद्र वंजारवाडकर,प्रसिद्ध अभिनेते प्रवीण तरडे यांच्याही सदिच्छा भेटी घेतल्या.यावेळी खासदार गिरीश बापट ,तसेच याच मतदार संघातून विधानसभा लढविण्यास जे इच्छुक होते ते स्थायी समितीचे माजी अध्यक्ष मुरलीधर मोहोळ ,संदीप खर्डेकर ,मंजुश्री खर्डेकर ,दीपक पोटे,जयंत भावे ,उज्वल केसकर ,शिवराम मेंगडे,सुशील मेंगडे आदी कार्यकर्ते उपस्थित होते .प्रभाग ३१ चे नगरसेवक सुशील मेंगडे यांनी कर्वेनगरच्या विकास मित्र मंडळ चौकात दादांचे जंगी स्वागत केले ,तर प्रभाग १३ मधे गोसावी वस्ती येथे नगरसेवक दीपक पोटे,नगरसेविका मंजुश्री खर्डेकर व जयंत भावे यांनी जोरदार स्वागत केले.विद्यमान आमदार मेधा कुलकर्णी यावेळी प्रकृतीस्वास्था अभावी अनुपस्थित होत्या असे समजते आहे .
कोथरूडमधून त्यांच्या नावाला विरोध झाला होता. ‘दूरचा नको, घरचा पाहिजे, आमचा आमदार कोथरूडचा पाहिजे’ असे फलक कोथरूड परिसरात भाजपच्या कार्यकर्त्यांकडून लावण्यात आले होते. कोथरूडमध्ये लावण्यात आलेल्या या पोस्टरला आणि विरोधाला प्रदेशाध्यक्ष चंद्रकांत पाटील यांनी फेसबूकवर एक व्हिडीओ पोस्ट करत उत्तर दिले आहे. ‘मी पुण्याचा, मी महाराष्ट्राचा, मी अवघ्या देशाचा आहे’, असे पाटील यांनी या व्हिडीओमध्ये म्हटले आहे.
चंद्रकांत पाटील यांनी पोस्ट केलेल्या साडेतीन मिनिटांच्या व्हिडीओमध्ये पुणेकरांना मतदान करण्याचे आवहन केलं आहे. पुणेकरांचे आणि माझे खूप जुने आणि घनिष्ठ नाते आहे. माझी पत्नी पुण्याची आहे. शिवाय मी पुण्यात विद्यार्थी सेनेत कार्यरत होतो. त्यामुळे मी पुण्याच्या बाहेरचा नाही. मी तुमच्यापैकीच एक आहे.
केंद्रीय नेतृत्वाने मला कोथरूड विधानसभा मतदारसंघातून निवडणूक लढवण्याची संधी दिली आहे. गेल्या अनेक वर्षांपासून विविध प्रकारे पुण्याशी माझे ऋणानुबंध जोडले गेले आहेत. त्यामुळे मी कोणी परका नसून पुण्याचाच आहे, अशी भावनिक सादही पाटील यांनी या व्हिडीओद्वारे पुणेकरांनी दिली आहे.
