मुंबई: कोहिनूर मिल प्रकरणात झालेल्या आर्थिक गैरव्यवहार प्रकरणी शिवसेना नेते, माजी मुख्यमंत्री मनोहर जोशी यांचे चिरंजीव आणि बांधकाम व्यावसायिक उन्मेष जोशी यांची ईडीने सात तास चौकशी केली. ही चौकशी समाधानकारक झाल्याचा दावा उन्मेष जोशींनी केला असून ईडी पुन्हा चौकशीसाठी बोलावणार असल्याची माहितीही त्यांनी दिली.
कोहिनूर प्रकरणी ईडीने मनसे अध्यक्ष राज ठाकरे आणि बांधकाम व्यावसायिक उन्मेष जोशी यांना नोटीस बजावण्यात आली होती. त्यानुसार उन्मेष हे आज दुपारी ईडीच्या कार्यालयात हजर झाले. चौकशीला सामोरे जाण्यापूर्वी त्यांनी प्रसारमाध्यमांशी संवादही साधला होता. मला नोटीस मिळाली असून ईडीच्या अधिकाऱ्यांची भेट घेण्यासाठी मी आलो आहे. मला ईडीकडून कोणतेही प्रश्न पाठण्यात आलेले नाहीत. मी त्यांना पूर्ण सहकार्य करेन. कदाचित कोहिनूर इमारतीसंबंधी माहिती घेण्यासाठी बोलावण्यात आलं असावं, अशी प्रतिक्रिया त्यांनी व्यक्त केली होती. ईडीच्या कार्यालयात गेल्यानंतर त्यांची सात तास चौकशी करण्यात आली. सायंकाळी ७ वाजताच ते ईडीच्या कार्यालयातून बाहेर पडले. ईडीने केलेल्या चौकशीने आपण समाधानी आहोत. ईडीच्या सर्व प्रश्नांची उत्तरे देण्यात आली आहेत, असं सांगतानाच ईडीकडून पुन्हा आपल्याला चौकशीसाठी बोलवण्यात येणार असल्याचंही त्यांनी सांगितलं. जोशींनी काही सहकाऱ्यांच्या साथीनं भागिदारीत व्यवसाय सुरू केला होता. त्यात इन्फ्रास्ट्रक्चर लीजिंग अँड फायनान्शियल सर्व्हिसेस (आयएलएफएस) या सरकारी क्षेत्रातील कंपनीने २२५ कोटींची गुंतवणूक केली होती. कालांतराने जोशी आणि त्यांच्या सहकाऱ्यांनी ९० कोटीला कंपनीचे समभाग विकले होते. त्यानंतरही कंपनीला अगाऊ कर्ज देण्यात आलं होतं. या कर्जाचा परतावा करण्यात आला नव्हता. त्यामुळे कोहिनूर सिटी एनएलने २०११मध्ये काही मालमत्ता विकून ५०० कोटींचा परतावा करण्याच्या करारावर सही केली होती. त्यामुळे आरएलएफएसकडून कोहिनूरला पुन्हा १३५ कोटींचं कर्ज देण्यात आलं होतं. या प्रकरणात अनियमितता झाल्याचं आढळून आल्यानं ईडीने त्याची चौकशी सुरू केली आहे.
