पुणे, ता. २१ : बिबवेवाडीच्या ईएसआयसी रुग्णालयाच्या विस्तारीकरणाच्या कामाचा केंद्रीय कामगार मंत्री भूपेंद्र यादव यांनी आज आढावा घेतला.
स्थानिक आमदार माधुरी मिसाळ यांच्या मागणीवरून यादव यांनी रुग्णालयाला भेट देऊन पाहाणी केली. या वेळी राज्याचे उच्च शिक्षण मंत्री चंद्रकांत पाटील, राज्याचे कामगार मंत्री सुरेश खाडे, आमदार मिसाळ यांची प्रमुख उपस्थिती होती.
बिबवेवाडीत ईएसआयसीच्या साडेसोळा एकर जागेवर ५०० खाटांचे रुग्णालय उभारण्याचे काम सुरू आहे. यादव यांनी आज या कामाचा आढावा घेतला.
या वर्षअखेरीपर्यंत आवश्यक परवानग्या आणि निविदा प्रक्रिया पूर्ण होईल. जानेवारी महिन्यापासून प्रत्यक्ष बांधकाम सुरू होणार असून, जून २०२५ पर्यंत टप्प्याटप्याने काम पूर्ण होणे अपेक्षित आहे. सर्व वैद्यकीय सोयींनीयुक्त सात मजल्याच्या इमारतीत सुमारे साठ हजार चौरस फूट बांधकाम होणार आहे. तळमजल्यावर अतिदक्षता विभाग, पहिल्या मजल्यावर बाह्य रुग्ण कक्ष, दुसर्या मजल्यावर बाह्य आणि आंतर रुग्ण सुपरस्पेशालिटी सुविधांसाठी स्वतंत्र कक्ष, तीन ते सातव्या मजल्यापर्यंत साधारण ते अतिदक्षता विभागाचे वॉर्ड असणार आहेत. रेडिओलॉजी, बायोकेमेस्ट्रि, मायक्रोबायोलॉजी अशा विविध प्रयोगशाळांचा समावेश असणार आहे. अशी माहिती केंद्रीय सार्वजनिक बांधकाम विभागाचे उदयकुमार चोगले आणि ईएसआयसीचे बिनय काकडे यांनी दिली.
आमदार मिसाळ म्हणाल्या, पर्वती विधानसभा मतदारसंघात एकही शासकीय रुग्णालय नाही. त्यामुळे सर्वसामान्य रुग्णांची मोठी गैरसोय होते. बिबवेवाडी येथील ईएसआयसीच्या नऊ एकर जागेवर ससूनच्या धर्तीवर रुग्णालय व्हावे यासाठी गेली दहा वर्षे सातत्याने पाठपुरावा करीत आहे. 500 खाटांचे रुग्णालय नियोजित वेळेत पूर्ण होईल यासाठी प्रयत्न करणार आहे.
