आ.टिळेकरांना -फोन रेकॉर्डिंगची ही व्हायरल क्लिप दोषी ठरवू शकेल काय ?

पुणे-भाजप चे हडपसर विधानसभा मतदार संघातील आमदार भायुमोचे प्रदेशाध्यक्ष योगेश टिळेकर यांच्यावर प्रख्यात  रवी बराटे यांनी 50 लाखाची खंडणी मागितल्याचा आरोप केला ,याप्रकरणी एक महिन्यानंतर आमदारांवर गुन्हा दाखल झाला .आता या प्रकरणी बिबवेवाडीतील मेघदूत हॉटेल मधील बैठकीतील संभाषणाचे  काही पुरावे बाहेर  आलेले नसले तरी आमदारांच्या आणि त्यांच्या बंधूंचे एकबोटे नामक कुणाशी फोनवर झालेल्या संभाषणाची ऑडीओ क्लिप मात्र व्हायरल झाली आहे.हि क्लिप कुणी आणि का व्हायरल केली आहे ? हे अद्याप स्पष्ट नसले तरी हि क्लिप आमदारांविरोधात सबळ पुरावा ठरू शकेल काय ?यावर मात्र चर्चा झडू लागल्या आहेत .एकंदरीत भाजपचे हे आमदार बदनामीच्या वावटळात पुरेपूर अडकल्याचे चित्र आहे.त्यांच्या पक्षाने याबाबत अद्याप काही भूमिका जाहीरपणे स्पष्ट केलेली नाही.
गेल्या वर्षापासून आपली बदनामी करण्यात येत असल्याचा दावा करत, हे राजकीय षड्यंत्र असल्याचा आरोप करत ,सफाई देत असलेल्या या भाजपमधील या सर्वात युवा आमदाराने विशेष म्हणजे हि क्लिप देखील नाकारल्याचे वृत्त  नाही .रवी बराटे आपले मित्र असल्याने ते आपल्याबरोबर असत,असे  ते सांगत आहेत तर दुसरीकडे बराटे यांच्याकडून मात्र त्यांच्यावर  फिर्याद करणे ,आणि आरोप करणे असे प्रकार होत असल्याचे दिसते  आहे.बराटे यांनी आजवर यापूर्वी अनेक प्रकरणे हाताळली आहेत .त्याबाबत त्यांची ख्याती आहे. पण आता सध्या तरी आ. टिळेकर प्रकरणातील या ऑडीओ क्लीपच्या चर्चेला उधाण आले  आहे .
आ. टिळेकर यांच्या म्हणण्यानुसार ,गणेश कामठे हा त्यांचा कार्यकर्ता आहे ज्याचा केबल व्यवसाय कोंढवा परिसरात  आहे.
फिर्यादी बराटे यांच्याबद्दल ते  इ व्हीजन टेलि इन्ट्रा प्रा.लि. (मेंहदळे गॅरेज, एरंडवणा) येथे नोकरीस असुन ते पुणे शहरातील दक्षिण विभागात एरिया मॅनेजर म्हणुन काम करतात. कंपनीतर्फे शहरातील विविध ठिकाणी इंटरनेट फायबर ऑप्टीक केबल मार्फत जोडण्याचे तसेच खासगी व्यक्ती व आय टी आय पार्क यांना शुल्क आकारून सेवा पुरविण्याचे काम केले जाते. अशी माहिती पूर्वीच प्रसिद्ध झाली आहे.
आमदारांच्या कार्यकर्त्यांच्या म्हणण्यानुसार  कोंढवा परिसरात केबल विषयी या कंपनीने त्यांचा कार्यकर्ता केबल व्यावसायिक कामठे याच्याशी काही करार करून केबल संदर्भात व्यवहार करण्याचा प्रयत्न केला .तेव्हा या दोघात काही मतभेद झाले आणि कार्यकर्त्याचे काम म्हणून त्यांना फोन लावून देण्यात आला . आणि आमदार सगळ्यांशी बोलतात तसे ‘त्याचे काय असेल काम करून टाका असे म्हणाले,त्यांनी स्वतः आणि त्यांच्या भावाने स्वतः पैशाचा विषय अगर शब्द  काढलेला नाही.
जेव्हा पलीकडून ‘कामठे 50 लाख मागतो ‘असे वाक्य आले तेव्हा त्यांच्याशी बोलणारा आमदारांचा भाऊ चेतन यांचे असे म्हणणे आहेकी , -क्षणभर मी थांबलो …आणि काही समजले नाही, म्हणून प्रत्यक्ष भेटून बोलू ;असे म्हणून विषय थांबविला’ असे म्हणणे मांडतो आहे .या प्रकरणी सोशल मिडीयावर देखील चर्चा उसळते आहे. तर काही ऑनलाईन माध्यमांना प्रसारित झालेल्या फिर्यादीच्या तोंडून ,हा आपला आवाज नाही असे आमदार म्हणू शकतात काय ? गृहखाते सीएम कडे आहे मग षड्यंत्र कोण करते ?राष्ट्रवादीची ११७ प्रकरणे भाजपने विरोधी पक्ष असताना विधीमंडळात  मांडली ती कागदपत्रे मीच  काढली होती ,मग तेव्हा विरोधकांचे कारस्थान होते काय ?तेव्हा मी काढलेली कागदपत्रे भाजपला गोड वाटत होती ?आणि आता ?अशी वाक्ये असलेले बाईट्स व्हायरल  होत आहेत .
दरम्यान या सर्व प्रकरणात सध्या महत्वाचा दुवा असलेली ऑडीओ क्लिप ‘ ऐकली तर ..हि क्लिप सबळ पुरावा ठरू शकते काय ? असा सवाल केला जातो आहे . तथापि महिनाभर तपास करून देखील ‘पोलीस तपास सुरु आहे’ एवढेच पोलीस सांगताना दिसत आहेत .
एकंदरीत या प्रकरणाने राजकीय वर्तुळात खळबळ उडाली असून आमदार टिळेकर या वादळातून बाहेर पडणार कि अडकणार ?या मागे खरोखर काही राजकीय षड्यंत्र आहे कि आमदार दोषी आहेत ?हे येणारा काळच सांगू शकणार आहे.