मुंबई- पेट्रोलचे भाव वाढले त्याला राज्य शासन जबाबदार आहे. राज्य शासन सर्वाधिक पन्नास टक्के कर आकारत आहे. जर हे कर कमी केले तर राज्यात पेट्रोलचे दर ७५ रुपये लीटर होतील, असा दावा माजी खासदार आणि भाजपाचे नेते किरीट सोमय्या यांनी केला आहे.
वसई विरार महापालिकेच्या निवडणुकीच्या पार्श्वभूमीवर भाजप नेते किरीट सोमय्या यांनी गुरूवारी वसईत भेट दिली. भाजप कार्यकर्त्यांच्या बैठकीनंतर त्यांनी पत्रकारांशी संवाद साधला. यावेळी त्यांनी सध्या सुरू असलेल्या विविध मुद्यांवर राज्य सरकारवर हल्लाबोल केला. राज्य सरकार सर्वाधिक कर आकारत आहे. त्यांनी कर कमी केल्यास पेट्रोल ७५ रुपयांनी मिळेल असं ते म्हणाले. मुख्यमंत्री उध्दव ठाकरे हे निवडणुकीतील पराजयाला घाबरत असल्याने त्यांनी निवडणुका पुढे ढकलण्याचे प्रयत्न सुरू केल्याचा आरोप त्यांनी केला.वसई विरार महापालिकेत भ्रष्टाचार आणि अनागोंदी माजली आहे. त्यामुळे येत्या २६ फेब्रुवारी रोजी महापालिका मुख्यालयावर भव्य मोर्चा काढला जाणार असल्याचे त्यांनी सांगितले. वसई विरार महापालिकेत भाजप घवघवीत यश मिळवेल असेही ते म्हणाले. वसई विरार महापाालिकेतून २९ गावे वगळण्याचा मुद्दा गाजत आहे. भाजप गावातील जनतेच्या बरोबर आहे, असे यावेळी जिल्हाध्यक्ष राजन नाईक यांनी सांगितले.
इंधनांच्या दरांमध्ये बुधवारी सलग नवव्या दिवशी वाढ करण्यात आल्यानंतर पहिल्यांदाच देशात पेट्रोलचे दर १०० रुपयांपलीकडे पोहचले. राजस्थानात पेट्रोलचे दर बुधवारी १०० रुपयांपलीकडे पोहचल्याचं चित्र पहायला मिळालं. जादा कर लागू होणारे ब्रँडेड पेट्रोल महाराष्ट्र, मध्यप्रदेश व राजस्थान यांसारख्या राज्यांत १०० रुपयांपलीकडे पोहचले असले, तरी नियमित पेट्रोलने शंभरी पार करण्याचा प्रकार पहिल्यांदाच घडला आहे. राजस्थानच्या श्रीगंगानगर शहरात पेट्रोलच दर बुधवारी लिटरला १००.०३ रुपये इतके वाढले.
