बिहार निवडणुकांचे निकाल म्हणजे शिवसेनेला चपराक-विरोधी पक्ष नेते प्रविण दरेकर

भाजपा प्रदेश कार्यालयात कार्यकर्त्यांचा जल्लोष
मुंबई दि. ११ नोव्हेंबर- बिहार निवडणुकांमध्ये मिळालेल्या विजयाचा जल्लोष आज भाजपाच्या महाराष्ट्र प्रदेश कार्यालयात साजरा करण्यात आला. बिहारच्या घवघवीत यशाबददल भाजपाचे पदाधिकारी व कार्यकर्त्यांनी एकमेकांना पेढे वाटून विजयाचा आनंद साजरा केला. या जल्लोषात विधानपरिषदेचे विरोधी पक्ष नेते प्रविण दरेकर यांच्यासह भाजपाचे पदाधिकारी, कार्यकर्ते व महिला कार्यकर्त्या मोठ्या संख्येने सहभागी झाले होते. बिहारच्या निवडणुकांचे निकाल म्हणजे भाजपाच्या नावाने उठसुठ टोलेबाजी करणा-या शिवसेनेला सणसणीत चपराक आहे. शिवसेनेला बिहारमध्ये आपल्या उमेदवारांचे डिपॉझिटही वाचविता आले नसल्याची नामुष्की ओढावली आहे, असा टोला विरोधी पक्ष नते प्रविण दरेकर यांनी मारला.
भाजपा कार्यालयातील या विजयी जल्लोषात भाजपाचे राष्ट्रीय सचिव विनोद तावडे, माजी खासदार किरिट सोमय्या, आमदार प्रसाद लाड, राज पुरोहित, अतुल शहा यांच्यासह भाजपचे कार्यकर्ते मोठ्या संख्येने उपस्थित होते. यावेळी बोलताना दरेकर यांनी सांगितिले की, बिहार विधानसभा निवडणुकीतल सर्व एक्झिट पोल बिहारच्या जनतेने खोटे ठरवुन पुन्हा एकदा भाजपा प्रणित एनडीएला स्पष्ट कौल दिला आहे. देशामध्ये नरेंद्र मोदी यांच्या विकासाच्या नेतृत्वाला बिहारच्या जनतेने पाठिंबा दिला आहे. भाजपाच्या सहकार्याने नितीश कुमार बिहारचे मुख्यमंत्री होतील अशी भूमिका पंतप्रधान नरेंद्र मोदी यांनी घेतली आहे. भाजपा दिलेला शब्द पाळतो असा संदेश या निकालाच्या माध्यमातून देशवासियांपर्यंत पोहोचला आहे असेही त्यांनी सांगितले.
भाजपावर उठसुठ टिका करणा-यांना बिहारसह उत्तरप्रदेश, गुजरात ,मणिपूर, तेलंगणा, येथील पोटनिवडणुकांच्या निकालांमुळे सणसणीत चपराक बसली आहे. जे भाजपाच्या नावने खडे फोडत आहेत, त्यांच्या उमेदवारांचे निवडणुकीतील डिपॉझिट सुध्दा जप्त होण्याची नामुष्की त्यांच्यावर आली आहे असल्याचा टोला मारताना दरेकर यांनी सांगतिले की, बिहार विधानसभा निवडणुकीत त्यांच्या पक्षाला थोडी फार मते मिळाली असून बिहारच्या जनतेने त्यांना त्यांची जागा दाखविली आहे. भविष्यामध्ये सुध्दा महाराष्ट्रात याची किंमत शिवसेनेला मोजावी लागेल. राष्ट्रवादी कॉंग्रेसचा सुध्दा बिहारमध्ये सुपडा साफ झाला आहे.
काँग्रेसला पण बिहारच्या जनतेने नाकारले असून त्यांना फक्त १८-१९ जागांवर समाधान मानावे लागले आहे. त्यामुळे बिहार निवडणुकीत तिन्ही पक्षाला भुईसपाट करण्याच काम या बिहारच्या जनतेने केलेल आहे. त्यामुळे महाराष्ट्र भाजपाच्यावतीने बिहारच्या जनतेचे आणि देशामधील विविध ठिकाणी झालेल्या पोटनिवडणुकांमध्ये जनतेने भाजपावर दाखविलेल्या विश्वासाबद्दल भाजपा सर्वांचे आभार मानत असल्याचेही दरेकर यांनी सांगितले.