पुणे-शहरातील वाहतूक नियोजनासाठी आता सर्व पोलिस उपायुक्तांवर विभागून जबाबदारी देण्यात आली आहे. त्यानुसार पुर्व आणि पश्चिम विभाग वर्गवारीनुसार सर्व पोलीस उपायुक्तांना नियुक्त करण्यात आले आहे.हे सर्व पोलीस अधिकारी आता महापालिकेकडून रस्त्यांचे अधिकृत नकाशे , त्यांची अधिकृत कायदेशीर रुंदी या सह तिथे असलेली अतिक्रमणे आणि अनधिकृत बांधकामे याबाबतची माहिती लेखी स्वरूपात मागविणार असल्याचे सांगण्यात आले आहे. वाहनांची संख्या वाढली त्या प्रमाणात रस्ते किंवा रस्त्यांच्या रुंदी आणि वाहनतळ वाढलीत काय ? सध्या काय अवस्था आहे आणि यावर काय करायला हवे यासठी पोलिसांचे खास पथक काम करेल असे सांगण्यात येते आहे .यावरून महापालिकेच्या वाहतूक नियोजन विभागासह अतिक्रमण विभागाच्या कामाची कसोटी येत्या काळात लागणार असल्याचे स्पष्ट आहे. साईड मार्जिनमधील अतिक्रमणे , पुढे सरकलेली दुकाने , इमारती ,प्रत्यक्षात ४ मजली इमारत शक्य आहे तिथे ८ मजली इमारती, पोटमाळे असा कारणांमुळे येथील वर्दळ संख्या वाढते आणि त्यामुळे वाहनाची संख्या हि त्या त्या ठिकाणी वाढते हे पोलिसाच पालिकेला दाखवून देणार काय ? असा सवाल यामुळे उपस्थित होतो आहे.
संबंधित अधिकारी यांना स्पॉटवर जाउन पाहणी करीत वारंवार होणारी वाहतूककोंडी, आवश्यक उपाययोजना, सिग्नल यंत्रणेसह गर्दीची ठिकाणांचा अहवाल तयार करावा लागणार आहे. अहवाल पोलिस आयुक्त अमिताभ गुप्ता आणि सहआयुक्त संदीप कर्णिक यांना सादर करण्यात येणार आहे. वाहतूक नियमनाच्या अभ्यासासाठी पोलिस आयुक्त अमिताभ गुप्ता यांनी उपक्रम हाती घेतला आहे.
वाहतूककोंडी दूर करण्यासाठी पुणे पोलिसांकडून दरदिवशी नवनवीन उपक्रम राबविण्यात येत आहेत. त्यामुळे मागील काही दिवसांपासून ठिकठिकाणांची वाहतूक सुरळित होण्यास मदत झाली आहे. दरम्यान, आता नव्याने हजर झालेल्या सर्व पोलीस उपायुक्तांकडेही वाहतूकीचा अभ्यास करण्याची जबाबदारी देण्यात आली आहे. त्यानुसार शहरातील 70 ते 80 ठिकाणी वारंवार होणाऱ्या कोंडीचा उपायुक्तांकडून अभ्यास केला जाणार आहे. त्यांच्याकडून घटनास्थळी जाउन वाहतूक पोलीस निरीक्षकांसोबत हद्दीतील वाहतूकीचा अभ्यास करावा लागणार आहे. तसेच, सिग्नल नियोजन करणे, परिसरातील अतिक्रमण, स्थानिक पथारीवाले, दररोज चौकातून मार्गस्थ होणारी वाहनसंख्येचीही माहिती घेतली जाणार आहे. पुर्व आणि पश्चिम विभागात प्रत्येकी तीन उपायुक्तांनी संपुर्ण वाहतूकीसंदर्भात माहिती काढून उपाययोजना सुचवावी लागणार आहे.
चौका-चौकात अधिकारी कर्मचाऱ्यांची फौज वाहतूक नियमनासाठी दिसून येत आहे. त्यामुळे वाहतूकीचा वेगही वाढला असल्याचे दिसून आले आहे. माय सेफ पुणे सिस्टीमद्वारेही वाहतूक नियमनाचा आढावा घेतला जात आहे. त्याशिवाय आता थेट सर्वच पोलिस उपायुक्तांकडे आपआपल्या हद्दीतील वाहतूकीचा आढावा घेउन अहवाल तयार करावा लागणार आहे. येत्या आठवड्याभरात संबंधित अहवाल सादर केल्यानंतर त्यानुसार उपाययोजना राबविण्यात येणार आहे. आगामी काही दिवसांत वाहतूक नियमनासाठी पुन्हा एकदा नाविण्यपुर्ण प्रयोग राबविण्यात येणार आहेत. त्यामुळे वाहनचालकांची कोंडीतून सुटका होण्यास मदत होणार आहे.
शहरभरातील वाहतूकीचा अभ्यास करण्यासाठी सर्वच पोलीस उपायुक्तांकडे जबाबदारी देण्यात आली आहे. त्यानुसार अधिकारी ऑनफिल्ड जाउन वेगवेगळ्या बाजूंनी माहिती तयार करणार आहेत. त्याचा अहवाल प्राप्त होताच, संबंधित हद्दीतील वाहतूक नियोजनासाठी आणखी प्राधान्य देण्यात येणार आहे. वाहतूक नियमन आणि विविध उपाययोजनांद्वारे कोंडी फोडण्यास प्राधान्य दिले आहे.
