विद्यार्थ्यांच्या आयुष्याशी खेळ करण्याची किंमत सरकारला मोजावी लागेल – प्रविण दरेकर

मुंबई, दि. १२ डिसेंबर – हे सरकार सातत्याने विद्यार्थ्यांच्या आयुष्याशी खेळ करतेय. परिक्षार्थी परीक्षा देण्यासाठी तयार असतात. पण आदल्या रात्री परीक्षा रद्द करण्याचे पाप हे सरकार करते. युवक आणि विद्यार्थ्यांच्या आयुष्याशी खेळ या सरकारने मांडलेला आहे. त्याची किंमत निश्चितपणे सरकारला मोजावी लागेल, अशी प्रतिक्रिया विधान परिषदेचे विरोधी पक्षनेते प्रविण दरेकर यांनी दिली.
म्हाडाची परीक्षा आयत्या वेळेला गैरव्यवहार झाल्याच्या कारणावरून अचानक रद्द करण्यात आली, त्या पार्श्वभूमीवर दरेकर प्रसारमाध्यमांशी बोलत होते. ते म्हणाले की, परीक्षांचा पूर्णपणे बट्टयाबोळ या सरकारने केला आहे. आरोग्य सेवकांच्या परीक्षेच्या बाबतीत असेच झाले. एजन्सीने घोळ घातला. त्याचबरोबर एमपीएससी परीक्षेच्या बाबतीत अशीच दुरवस्था झाली. सरकार कोणत्याही प्रकारे या परीक्षा आणि विद्यार्थ्यांच्या बाबतीत गंभीर नाही. किंबहुना या परीक्षांच्या माध्यमातून भ्रष्टाचार तसेच आपली लोक घेणे, त्या माध्यमातून भ्रष्टाचार करणे हे तर त्यामागे लपलेले नाही ना, अशा प्रकारचा संशयही दरेकर यांनी व्यक्त केला. याची जबाबदारी सरकारने घ्यायला पाहिजे. जे संबंधित असतील त्यांनी याचे प्रायश्चित्त घेतले पाहिजे. भविष्यात मुलांच्या आयुष्याशी खेळ होणार नाही याची काळजी सरकारने घेतली पाहिजे. सरकार सर्व पातळ्यांवर अपयशी ठरले आहे, अशी टीकाही त्यांनी केली