पुणे-नाना पेठेतील ओर्नेलाज हायस्कूल जवळील सिटी चर्चला ८ डिसेंबर २०१७ रोजी २२५ वर्षे
पूर्ण होत आहेत.त्या निमित्ताने आज दि २८ नोव्हेंबर २०१७ पासून विविध कार्यक्रमांचे आयोजन होण्यास
सुरुवात झाली. आज सायंकाळी ५ वाजता रस्ता पेठेतील होली एन्जल चर्च (कादर चौक )येथून मदर
मेरीच्या पुतळ्याची भव्य शोभा यात्रा काढण्यात आली. शोभायात्रेच्या अग्रभागी मुंबईचा सेंट फ्रान्सिस ब्यांड
होता.पाठोपाठ मदर मेरीचा पुतळा खांद्यावर घेतलेले स्वयंसेवक होते. पाठोपाठ सुमारे ५०० हून अधिक
ख्रिश्चन बांधव आणि भगिनी हातात प्ले कार्ड , ब्यानर, झेंडे घेऊन प्रार्थना म्हणत जात होते. रस्ता
पेठेतून एथेल गोर्डन कॉलेज – क़्वारटर गेट मार्गे ही शोभायात्रा सिटी चर्च येथे पोहोचली . मार्गावर ठीक
ठिकाणी फुलांचा वर्षाव करीत , फटाके वाजवत नागरिक शोभायात्रेचे स्वागत करीत होते. या शोभायात्रेत
सिटीचर्चचे प्रमुख फादर साल्व्हीडोर पिंटो ,विविध धर्मगुरू सहभागी झाले होते.
सिटीचर्च रंगीबेरंगी दिव्यांनी सजवण्यात आले होते. तेथे पुणे धर्म प्रांताचे बिशप थोमस डाबरे
यांच्याकडे फादर पिंटो यांनी मदर मेरीचा पुतळा स्वाधीन केला. त्यानंतर बिशप डाबरे यांच्या हस्ते मदर
मेरींचे चिन्ह असणाऱ्या ध्वजाचे ध्वजारोहण करण्यात आले. याप्रसंगी सामुहिक प्रार्थना झाल्यानंतर बिशप
डाबरे यांनी या चर्चच्या इतिहासाची माहिती देऊन म्हटले की, मदर मेरी ही येशू ख्रीस्तांची आई असून
त्यांनी साऱ्या समाजात चांगल्या संकृतीचा आणि विचारांचा संदेश रुजवला आहे,आपण भारतीय आपल्या
भूमीशी एकनिष्ठ राहून,येथील गोरगरीब जनतेसाठी काम करणे हा संस्कार त्यांच्या विचारांमुळेच
आपल्यात रुजला आहे
यानंतर सिटीचर्चमध्ये धार्मिक विधी करण्यात आले. ८ डिसेंबर पर्यंत तेथे रोज विविध धर्मगुरूंची
प्रवचने व अन्य कार्यक्रम होणार आहेत.या चर्चसाठी सन १७७४ मध्ये दुसर्या माधवराव पेशव्यांनी ४ एकर
जागा दिली व नाना फडणवीस यांनी पेशव्यांच्यावतीने आर्थिक मदत उपलब्ध केली आणि सन १७९२
मध्ये हे चर्च अस्तित्वात आले. आता ८ डिसेंबर रोजी पेशव्यांच्या वारसांचा सत्कार कृतज्ञता सोहळा
म्हणून केला जाणार आहे.
