पुणे: पुण्याचा आंतरराष्ट्रीय रॅली ड्रायव्हर संजय टकले याच्यासाठी नव्या मोसमाची सुरवात यशाच्या निकषावर लक्षवेधी झाली, तसेच संघभावनेच्या दृष्टिने त्याने खुप काही कमावले. थायलंडमधील राष्ट्रीय रॅली मालिकेच्या पूर्वतारीसाठी होणाऱ्या प्री-रॅली मालिकेतील अखेरच्या फेरीत हायड्रॉलीक क्लच पंप बिघडल्यानंतरही तीन स्टेज एकाच गिअरमध्ये चालवित त्याने रॅली पूर्ण केली. याबरोबच तो एकुण क्रमवारीत तिसरा, तर थायलंडचा नॅव्हीगेटर मिनील थान्याफात एकुण क्रमवारीत पहिला आला.
रविवारी थायलंडमधील चांताबुरी प्रातंमधील पाँग नाम रॉन येथे ही रॅली झाली. गेल्या मोसमातील अखेरची चौथी फेरी यंदा झाली. त्यात सहाव्या स्टेजला संजयच्या इसुझी डीमॅक्स युटीलीटी कारचा क्लच पंप बिघडला. त्यामुळे त्यांना 38 किलोमीटर अंतर दुसऱ्या गिअरमध्येच कार चालवावी लागली. त्यामुळे त्यांची दीड मिनिटे वाया गेली. ती स्टेज पूर्ण केल्यानंतर सर्व्हिसिंगमध्ये बिघाड दुरुस्त करून त्यांनी सातवी स्टेज सुरु केली. त्यात त्यांनी दुसऱ्या क्रमांकाची वेळ नोंदविली. आठव्या स्टेजला आत्मविश्वासाने सुरवात केल्यानंतर इंजिन माऊंट एका बाजूला कलल्यामुळे हाड्रॉलीक क्लच पंप तुटला. ही स्टेज त्यांना तिसऱ्या गिअरमध्ये चालवावी लागली. नववी स्टेजही त्यांना अशाच प्रकारे चालवावी लागली. त्यात स्टेजपूर्वी त्यांना कार पुश स्टार्ट म्हणजे ढकलून सुरु करावी लागेली.
संजयने फॉरेन ओपन फोर बाय फोर गटात सातवे स्थान मिळविले. मालिकेतील तीन फेऱ्या पूर्ण केल्यामुळे संजयला एकूण क्रमवारीसाटी पात्र ठरला आले. त्याच्यापेक्षा पुढे असलेल्या इतर स्पर्धकांनी दोनच फेऱ्या केल्या होत्या.
रेकीपूर्वीच रॅली
संजयसाठी मोसमाची सुरवात नाट्यमय झाली. आईसलँडहून परतल्यानंतर संजयला जेमतेम दोन दिवसांचा ब्रेक मिळाला. मुंबईहून बँकॉकला शनिवारी मध्यरात्री दोन वाजता सुटणारे विमान दीड तास उशीरा निघाले. दरम्यान, त्याने मिनीलशी संपर्क साधला होता. बँकॉकमध्ये सकाळी सव्वा नऊ वाजता लँडींग झाल्यानंतर व्हीसाची प्रक्रिया पूर्ण करून तो बाहेर आला. मिनील रॅली एसयुव्ही फोर बाय फोर घेऊन सज्ज होता. सकाळी दहा वाजता मिनीलने चांताबुरीसाठी स्टार्टर मारला. 290 किलोमीटर अंतर त्यांनी तीन तासांत पार केले. दुपारी एक वाजता ते पोचले. रेकीची वेळ सकाळी 11 ते दोन अशी होती. तेथे विचाई वात्ताहाविशुथ तेथे रोड बुक घेऊन उपस्थित होते. ते घेऊन संजयने रेकी सुरु केली. तिन्ही स्टेजमधून एकदा जात मिनीलने पेस नोट्स घेतल्या. त्यांना दुसरी फेरी पूर्ण करण्याइतका वेळ मिळाला नाही. तीन तासांची रेकी एका तासात पूर्ण करीत ते दुपारी दोन वाजता होणाऱ्या स्पर्धकांच्या बैठकीच्या ठिकाणी जायला निघाले. त्यांना दहा मिनिटे उशीर झाला.
या बैठकीनंतर सायंकाळी चार वाजता रॅलीचे औपचारीक उद्घाटन झाले. ते सायंकाळी साडेपाच वाजता पूर्ण झाले. त्यानंतर हॉटेलवर जात संजयने अखेर भोजन केले. रविवरी सकाळी सात वाजता रॅल सुरु होणार होती. तिन्ही स्टेज प्रत्येकी तीन वेळा पूर्ण करायच्या होत्या. एकूण नऊ स्टेज होत्या.
रॅलीनंतरही कसोटी
ही रॅली झाल्यानंतर संजय सोमवारी भारतात परतणार होता, पण कार दुरुस्त झाली नव्हती. त्यामुळे तो संघाच्या मदतीसाठी थांबला. त्यासाठी त्याने विमान तिकीटाची तारीख बदलली.
संजय म्हणाला की, विचाई वात्ताहाविशुथ यांचा संघ माझ्यासाठी बरीच मेहनत घेतो. त्यामुळे कार बिघडली असताना त्यांना असे मध्येच सोडून परत येणे मला योग्य वाटले नाही.
मागील वर्षी झालेल्या दोन फे-या त्याला तांत्रिक बिघाडामुळे पुर्ण करता आल्या नव्हत्या.
