कोथरूडमध्ये सोमवारी रंगणार ‘सोनेरी चंदेरी’ पहाट

महक’ प्रस्तुत पंचतारांकित गंधर्वांच्या अजरामर गीतांची-किश्श्यांची अनोखी दिवाळी पहाट
पुणे : भावसंगीताचे किमयागार व सुवर्णकाळाचे शिल्पकार कवी मंगेश पाडगावकर, गायक अरुण दाते, कवयित्री शांता शेळके, संगीतकार श्रीनिवास खळे व यशवंत देव या पंचतारांकित गंधर्वांनी अजरामर केलेल्या गीतांची ‘सोनेरी चंदेरी’ दिवाळी पहाट सोमवारी (दि. १ नोव्हेंबर) कोथरूड येथील यशवंतराव चव्हाण नाट्यगृहात रंगणार आहे. प्रसिद्ध गायिका मनीषा निश्चल यांच्या महक प्रस्तुत, माणिक एंटरटेनमेंट निर्मित ‘सोनेरी चंदेरी’ची दिवाळी पहाट मैफल श्रोत्यांना विनामूल्य अनुभवता येणार आहे.
सोबतच मंगेश पाडगावकर यांच्या निवडक कविता, पाडगावकर आणि अरुण दाते यांच्या आयुष्यातील रंजक किस्से अंजली पाडगावकर-कुलकर्णी आणि अतुल अरुण दाते यांच्याकडून ऐकण्याची पर्वणी कोथरुडकरांना मिळणार आहे. ‘सोनेरी चंदेरी’च्या या मैफलीत मनीषा निश्चल यांच्यासह जितेंद्र अभ्यंकर, चैतन्य कुलकर्णी यांचे गायन होईल. केदार परांजपे, प्रसन्न बाम, निलेश देशपांडे, अजय अत्रे, आदित्य आठल्ये, जीवन कुलकर्णी वाद्यांवर साथसंगत करणार आहेत.
मनीषा निश्चल म्हणाल्या, “कोरोनामुळे गेल्या वर्षी दिवाळी पहाटसह इतर कोणतेही सांगीतिक कार्यक्रम होऊ शकले नाहीत. त्यामुळे कलाकारांसह रसिकांसाठीही ही एक पर्वणी आहे. अनेक महिन्यांनंतर आम्ही सर्व कलाकार सादरीकरण करणार असून, रसिकांनी आम्हाला दाद देण्यासाठी आणि आपले कान तृप्त करण्यासाठी ‘सोनेरी चंदेरी’ची पहाट अनुभवण्यासाठी यावे. हा कार्यक्रम विनामूल्य असून, त्याच्या प्रवेशिका कार्यक्रमस्थळी उपलब्ध असतील.”