बंगळूरू येथे आयोजित अलंकरण समारंभात दक्षिण कमांडमधील सैनिक आणि युनिटचा गौरव

पुणे 13 जानेवारी 2023-दक्षिण भारत एरिया मुख्यालयाच्या नेतृत्वाखाली, बंगळूरू येथील मद्रास इंजिनिअरिंग गृप अँड सेंटर येथे 12 आणि 13 जानेवारी 2023 रोजी दक्षिणी कमांड अलंकरण समारंभ आयोजित करण्यात आला.
लष्कराच्या दक्षिणी विभागाचे प्रमुख लेफ्टनंट जनरल अजय कुमार सिंह,एव्हीएसएम, वायएसएम, एसएम, व्हीएसएम यांनी दक्षिण कमांडमधील 40 लष्करी अधिकारी, जवानांना शौर्य पुरस्काराने गौरवले. तसेच विविध क्षेत्रांमधील उल्लेखनीय कामगिरीबद्दल24 युनिटांचा पुरस्कार देऊन गौरव करण्यात आला.या भव्य अलंकरण सोहोळ्यामध्ये मद्रासइंजिनिअरिंग गृप अँड सेंटर, मद्रास रेजिमेंटल सेंटर,बॉम्बे इंजिनिअरिंग गृप अँड सेंटर,महार रेजिमेंटल सेंटर, पॅरा रेजिमेंटल सेंटर तसेच नाशिक आणि हैदराबाद येथील तोफखाना केंद्र या सहा तुकड्यांनी अत्यंत प्रभावी संचलन सादर केले तसेच शस्त्रास्त्रांचे प्रदर्शन, मोटारसायकल कसरती, कॉम्बॅट फ्री फॉल आणि फ्लायपास्ट यांची विविध थरारक प्रदर्शने हे या समारंभाचे मुख्य आकर्षण ठरले.

या प्रसंगी उपस्थितांना संबोधित करताना आर्मी कमांडर सिंह यांनी सर्व पदकप्राप्त जवानांचे आणि गौरवप्राप्त तुकड्यांचे त्यांच्या गुणवत्तापूर्ण सेवेबद्दल अभिनंदन केले आणि अशाच प्रकारची कामगिरी भविष्यात करण्याची अपेक्षा व्यक्त केली. या सोहोळ्यात गौरवण्यात आलेल्या जवानांनी दाखविलेले धाडस, शौर्य आणि समर्पण वृत्ती यांचे अनुकरण करुन देशाला आणि भारतीय लष्कराला अभिमान वाटेल अशी कामगिरी करण्याचे आवाहन त्यांनी लष्कराच्या सर्वच श्रेणीतील कर्मचाऱ्यांना केले.दक्षिण कमांड हा भारतीय लष्करातील सर्वात प्राचीन आणि सर्वात मोठा विभाग असून तो भारतीय भूभागाचा सुमारे 40% भागावर कार्यरत आहे आणि त्याची कार्यकक्षा देशातील नऊ राज्ये आणि तीन केंद्रशासित प्रदेशांमध्ये विस्तारलेली आहे ही बाब त्यांनी अधोरेखित केली.आर्मी कमांडर म्हणाले की दक्षिणी कमांडने काळाच्या कसोटीवर स्वतःला सिद्ध केले असून लष्कराच्या असंख्य कारवायांमध्ये गुणवत्तापूर्ण कामगिरीसह यशस्वी सहभाग नोंदवला आहे.

पारितोषिक वितरण समारंभानंतर, आर्मी कमांडर लेफ्टनंट जनरल अजय कुमार सिंग यांनी पारितोषिक विजेते जवान आणि त्यांच्या कुटुंबियांशी संवाद साधला आणि त्या जवानांच्या अभूतपूर्व समर्पण तसेच देशसेवेप्रती कटिबद्धतेबद्दल तसेच कर्तव्यावर असताना केलेल्या उत्कृष्ट कामगिरीबद्दल देखील कृतज्ञता व्यक्त केली. या कार्यक्रमामध्ये उपस्थित असलेल्या माजी सैनिकांशी देखील त्यांनी संवाद साधला आणि त्यांचा वारसा, परंपरा तसेच त्यांनी देशाप्रती दिलेल्या योगदानाची प्रशंसा केली.
माजी सैनिकांचे कल्याण आणि स्वास्थ्याप्रती दक्षिण कमांडच्या वचनबद्धतेचा त्यांनी याप्रसंगी पुनरुच्चार केला.
बंगलुरू येथे प्रथमच दक्षिण कमांड अलंकरण समारंभ आणि सेना दिवस 2023 या दोन्ही कार्यक्रमांचे आयोजन करण्यात आले होते आणि हा अभिमानाचा क्षण म्हणजे दक्षिण भारतातील समृद्ध लढाऊ परंपरा आणि येथील लोकांचे समर्पण यांच्याप्रती आदरांजली आहे.