पुणे; फर्ग्युसन महाविद्यालय, पुणे आणि महाराष्ट्र राज्य वनविभाग वन्यजीव (पश्चिम) ह्यांच्या संयुक्त विद्यमाने दि. २२ ऑगस्ट २०१९ ते २५ ऑगस्ट २०१९ दरम्यान ‘वाईल्ड इंडिया’ वन्यजीव चित्रपट महोत्सवाचे आयोजन फर्ग्युसन महाविद्यालयाच्या अँफीथिएटरमध्ये करण्यात आले आहे. हे महोत्सवाचे दुसरे वर्ष असून सृष्टी फाऊन्डेशन आणि ऍड-व्हेंचर फाऊन्डेशन ह्या महोत्सवाचे सहआयोजक आहेत. ह्या निमित्ताने भारतातील अनेक नामवंत वन्यजीव चित्रपट दिग्दर्शक/निर्माते ह्यांचे प्रसिद्ध चित्रपट आणि माहितीपट सर्वांना पाहता येतील.
ह्या महोत्सवाचे उद्घाटन सुप्रसिद्ध वन्यजीव चित्रपटकार श्री. शेकर दत्तात्री ह्यांच्या हस्ते २२ ऑगस्ट रोजी सायं. ६.०० वाजता करण्यात येणार आहे. ह्या प्रसंगी महाराष्ट्र राज्य वनविभाग अप्पर प्रधान मुख्य वन संरक्षक(वन्यजीव, पश्चिम) श्री. सुनील लिमये; पुणे पोलीस आयुक्त डॉ.वेंकटेशम के.; पुणे महानगरपालिका आयुक्त श्री. सौरभ राव; आणि एअर मार्शल(निवृत्त) श्री. भूषण गोखले, लीला पूनावाला फाउंडेशनच्या अध्यक्षा पद्मश्री श्रीम. लीला पूनावाला ह्यांची प्रमुख उपस्थिती लाभणार आहे. महोत्सवाच्या उद्घाटनानंतर शेकर दत्तात्री निसर्गप्रेमींशी संवाद साधणार आहेत तसेच त्यांनी बनवलेल्या माहितीपटातील काही दृश्यांची झलकही ह्या वेळी निसर्गप्रेमींना पाहायला मिळेल.
दि. २३ ऑगस्ट रोजी सायं. ६.३० वाजता सुप्रसिद्ध वन्यजीव चित्रपटकार श्री. नल्ला मुत्थू ह्यांच्याशी सुप्रसिद्ध अभिनेते श्री. सुयश टिळक संवाद साधणार आहे. ह्या वेळी नल्ला मुत्थू ह्यांच्या एकंदर कारकीर्दीवर श्री. सुयश टिळक प्रकाश टाकणार असून ह्यावेळी निसर्गप्रेमींनाही नल्ला ह्यांच्याशी संवाद साधता येईल. ह्या अगोदर सायं. ५ वाजता काही वन्यजीव चित्रपट दाखवले जातील. आणि ह्या मुलाखतीनंतर नल्ला ह्यांचा ‘क्लॅश ऑफ टायगर्स’ हा नवीन प्रदर्शित झालेला वन्यजीव चित्रपट दाखवण्यात येईल.
तसेच सदर महोत्सवादरम्यान इतर दिवशी भारतातील प्रसिद्ध वन्यजीव चित्रपटकार श्री. नल्ला मुत्थू, श्री. शेकर दत्तात्री, श्री. माईक पांडे, श्री. संदेश कडूर, श्री. विनोद बारटक्के, श्रीम. रिटा बॅनर्जी, श्री. किरण घाडगे, इ. चे वाघ, सिंह, कासव, हिमबिबट्या, क्लाऊडेड लेपर्ड ह्या जीवांवरील तसेच निसर्गातील इतर बाबींनाही स्पर्श करणारे अत्यंत दुर्मिळ आणि जरूर पाहावे असे चित्रपट आणि माहितीपट दाखवण्यात येणार आहेत. ह्याशिवाय ह्या वर्षी आंतरराष्ट्रीय पातळीवरील बाबींवर प्रकाश टाकणारे दोन वन्यजीव माहितीपटही दाखवण्यात येणार आहेत. दि. २३ ऑगस्ट सायं. ५ वा. आणि दि. २४ ऑगस्ट रोजी सायं. ४ वा. माहितीपट दाखवण्यास सुरुवात होणार असून दि. २५ ऑगस्ट रोजी सकाळी १० वा. आणि सायं. ३.३० वा. अशा दोन सत्रात माहितीपट दाखवले जाणार आहेत.
प्रसिद्ध वन्यजीव चित्रपटकार श्री. नल्ला मुत्थू ह्यांच्या कौशल्यांचा आणि अनुभवांचा फायदा सर्वांना व्हावा ह्यासाठी दि. २५ ऑगस्ट रोजी दुपारी १.३० ते ३.३० ह्या दरम्यान फर्ग्युसन महाविद्यालयात एका चित्रपट निर्मिती कार्यशाळेचे आयोजन करण्यात आलेले आहे. तसेच भारतातील अत्यंत दुर्मिळ खनिजे आणि जीवाश्म व वन्यजीवनाचे प्रतिबिंब असेलेली नाणी, स्टँप ह्यांचे प्रदर्शनही २४ ऑगस्ट आणि २५ ऑगस्ट रोजी फर्ग्युसन महाविद्यालय येथे मांडण्यात येणार असून ते सर्वांसाठी स. १० ते सायं. ५ या वेळेत विनामुल्य खुले असणार आहे. ह्या प्रदर्शनाचे उद्घाटन २४ ऑगस्ट रोजी ज्येष्ठ पर्यावरणतज्ञ पद्मभूषण डॉ. माधव गाडगीळ ह्यांच्या हस्ते सकाळी दहा वाजता होणार आहे. तसेच २४ ऑगस्ट रोजी सकाळी १०.३० ते ११.३० या वेळेत पद्मभूषण डॉ. माधव गाडगीळ, प्रा. श्री.द.महाजन, डॉ. विलास बर्डेकर अशा काही तज्ञ मंडळींसोबत खुल्या चर्चासत्राचे आयोजन करण्यात आले आहे.
ह्या महोत्सवाचे खास आकर्षण म्हणजे महोत्सवाच्या शेवटच्या दिवशी दि. २५ ऑगस्ट रोजी जगप्रसिद्ध वन्यजीव छायाचित्रकार श्री. ध्रीतीमान मुखर्जी सायं. ६.१५ ते ८.३० ह्या दरम्यान निसर्गप्रेमींशी संवाद साधणार आहेत. ह्या कार्यक्रमाने महोत्सवाची सांगता होणार असून डेक्कन एज्युकेशन सोसायटीचे अध्यक्ष श्री. शरद कुंटे आणि प्रादेशिक पारपत्र अधिकारी श्री. अनंत ताकवले ह्यांची प्रमुख उपस्थिती ह्या कार्यक्रमास लाभणार आहे.
सदर महोत्सवाला ‘रावेतकर हाउसिंग’ आणि ‘सोसायटी फॉर वाईल्डलाईफ एज्युकेशन आणि कॉन्सर्वेशन’ प्रमुख प्रायोजक म्हणून लाभले असून ‘क्रेडाई-पुणे मेट्रो’ ‘व्यंकटेश बिल्डकॉन’, ‘ पंडित जावडेकर’, ‘ट्रुस्पेस’ सह-प्रायोजक म्हणून लाभले आहेत. तसेच ह्या महोत्सवाला ‘सी.एम.एस. वातावरण’, ‘ग्लोबल टायगर फोरम’, ‘द टेरेटोरी’ ‘वाईल्डलाईफ अनलिमिटेड’ आणि ‘हेरीटेज डिझाईन्स’ ह्यांचे पाठबळ लाभले आहे. हा महोत्सव सर्वासाठी विनामुल्य असून जास्तीत जास्त निसर्गप्रेमींनी त्याचा लाभ घ्यावा असे आवाहन आयोजकांतर्फे करण्यात आलेले आहे.
