मुंबई-मी मुख्यमंत्रीपद आणि शिवसेना पक्षप्रमुखपद सोडायला तयार आहे. मात्र, समोर येऊन सांगा, अशी साद उद्धव ठाकरे यांनी बुधवारी बंडखोरांना घातली. त्यांच्या या भावनिक फेसबुक लाइव्हनंतर उद्धव ठाकरे यांची भेट घेण्यासाठी राष्ट्रवादी काँग्रेसचे अध्यक्ष शरद पवार आणि खासदार सुप्रिया सुळे वर्षा निवासस्थानावर दाखल झालेत. दुसरीकडे सायंकाळी सात वाजता एकनाथ शिंदे गुवाहटीत पत्रकार परिषद घेणार आहेत. आता ते काय बोलतात, याची उत्सुकता आहे.शिवसेनेने व्हीप जारी करून आपल्या आमदारांना संध्याकाळी मुख्यमंत्री निवासस्थानी पोहोचण्याचे आदेश दिले आणि अनुपस्थित राहिल्यास कारवाईचा इशारा दिला. यानंतर काही वेळातच एकनाथ शिंदे यांच्या ट्विटने खळबळ उडवून दिली. त्यात ते म्हणाले, हा व्हीप बेकायदेशीर आहे. याशिवाय त्यांनी सुनील प्रभू यांच्या जागी भरत गोगावले यांची मुख्य व्हीप म्हणून नियुक्ती केली. म्हणजेच आता शिंदे यांनी थेट शिवसेना पक्षावरच दावा ठोकला आहे. यासोबतच त्यांनी 34 आमदारांच्या पाठिंब्याचे पत्र राज्यपाल आणि उपसभापतींना दिले आहे.
दरम्यान उद्धव ठाकरे यांनी ट्वीट करून बंडखोरांना निरोप दिला आहे, माझ्या राजीनाम्याचे पत्र तयार ठेवले आहे मुंबईत या राजीनाम्याचे पत्र घेऊन जा असे त्यांनी म्हटले आहे.
