पुणे -जितेंद्र आव्हाड यांच्या विरोधात जाणीवपूर्वक गुन्हे दाखल होत नाही, सर्व घटना सीसीटिव्ही फुटेजमध्ये कैद असून ते पाहून राष्ट्रवादी काँग्रेसचे प्रमुख शरद पवार यांनी आव्हाड यांचा राजीनामा घ्यावा. आव्हाड यांची स्टटबाजी यापुढे चालणार नाही कारण आता राज्याचे गृहमंत्री दिलीप वळसे पाटील नाही, तर देवेंद्र फडणवीस आहे, असे भाजपचे प्रदेशाध्यक्ष चंद्रशेखर बावनकुळे यांनी म्हटले आहे.
पुण्यात भाजप पक्षाची संघटना चांगली असून सन 2024 पर्यंत पक्षाने सामाजिक दृष्ट्या भक्कम व्हावे यासाठी काम करण्यात येईल. सरकारच्या योजना लाभ जोपर्यंत नागरिकांना मिळत नाही तोपर्यंत पक्ष विस्तार होऊ शकत नाही. 2024 मध्ये महाराष्ट्रमध्ये भाजप-शिवसेना आणि मित्रपक्ष मिळून 45 खासदार आणि 220 आमदार निवडून आणण्याची तयारी करत आहे. त्यादृष्टीने पक्षाचा माध्यमातून काम करण्यात येत आहे असे मत भाजपचे प्रदेशाध्यक्ष चंद्रशेखर बावनकुळे यांनी सोमवारी पत्रकार परिषदेत व्यक्त केले.
यावेळी शहर अध्यक्ष जगदीश मुळीक, माजी महापौर आणि भाजप प्रदेश सरचिटणीस मुरलीधर मोहोळ, आमदार माधुरी मिसाळ, आमदार सिद्धार्थ शिरोळे, विक्रांत पाटील, राजेश पांडे, गणेश बिडकर, दीपक पोटे, सुशील मेंगडे उपस्थित होते.
भाजपचे प्रदेशाध्यक्ष चंद्रशेखर बावनकुळे म्हणाले की, केंद्र सरकारच्या योजनांना माहविकास आघाडी सरकारने मागील काळात ब्रेक लावण्याचे काम केले. पेट्रोल, डिझेल, गॅस या दरवाढीचा आंतरराष्ट्रीय बाजारभावानुसार अवलंबून असल्याने महागाई समस्या जाणवते. 12 ऑगेस्ट रोजी मला केंद्रीय नेतृत्वाने पदभार दिला. त्यानंतर संपूर्ण राज्यात संघटनात्मक प्रवास योजना आखली त्यानुसार हा 26 वा जिल्हा आहे.
10 डिसेंबर पर्यंत राज्यातील सर्व जिल्ह्यातील दौरा पूर्ण करण्यात येणार आहे. केंद्र शासनाच्या विविध योजना ज्या अमलबजावणी करण्यात आल्या त्याची माहिती लोकांपर्यंत पोहचवण्यासाठी प्रयत्न करत आहे. फ्रेंडस ऑफ बीजेपी ही योजना सुरू करण्यात येणार आहे.त्यासाठी हेल्पलाईन 7030776161 हा सुरू करण्यात आली असून भाजप कडून त्यांना जे अपेक्षित आहे त्याची नोंदणी घेण्यात येणार आहे.20 परिवार एक पालकत्व योजना द्वारे प्रत्येक घरापर्यंत पोहचणे लक्ष्य ठेवण्यात आले आहे.
