पुणे : पुण्यनगरीचे प्रथम नागरिक अशा प्रतिष्ठेचे पद असलेल्या महापौरांचाही गुन्हेगारीत समावेश आहे काय ? असा प्रश्न उपस्थित करत पुणेकर म्हणून नक्कीच शरमेने मान खाली घालायला लावणारी घटना आहे. ज्या गुंड सदा ढावरेच्या माध्यमातून ही संघटित गुन्हेगारी करण्यात येत होती, त्या सदा ढावरेला गेल्या आठ दिवसांपासून कुणाकुणाचे फोन आले होते, यात आणखी कोण सहभागी आहे, हे तपासण्यासाठी ढावरेचा ‘सीडीआर’ काढण्यात यावा, अशी मागणी राष्ट्रवादी काँग्रेसतर्फे शनिवारी पोलिस आयुक्तांकडे करण्यात येणार आहे.अशी माहिती आज येथे पत्रकार परिषदेत राष्ट्रवादीचे अध्यक्ष प्रशांत जगताप यांनी दिली
प्रशांत जगताप म्हणाले,’भाजपचे प्रदेशाध्यक्ष व कोथरूडचे आमदार चंद्रकांत पाटील यांच्या उपस्थितीतील कार्यक्रमात गुन्हेगारी पार्श्वभूमी असलेल्या काहीजणांचा भाजप प्रवेश करण्याचा प्रयत्न बुधवारी फसला. परंतु, सत्य फार काळ लपून राहात नाही, हे पुन्हा एकदा सिद्ध झाले असून, भाजपच्या पदाधिकाऱ्यांचे दोन कारनामे नव्याने उघड झाले आहेत. माझ्या वानवडी प्रभागातील भाजपचे नगरसेवक धनराज घोगरे यांनी मारहाण केल्याची व धमकावल्याची तक्रार एका ठेकेदाराने केली आहे. यात अधिक चौकशी केली असता, हे प्रकरण तेवढ्यापुरतेच मर्यादित नसून,या प्रकरणाचा थेट संबंध महापौरांपर्यंत येऊन ठेपला आहे. परंतु, महापौरपद हे सन्माननीय पद असल्याने त्यांच्यावर गुन्हा दाखल करावा, अशी मागणी आम्ही करणार नाही. मात्र, भाजपचे शहराध्यक्ष, प्रदेशाध्यक्ष, सभागृहनेत्यांनी या प्रकरणी खुलासा करावा, अशी मागणी आम्ही करीत आहोत. तसेच, ही घटना गंभीर असल्याने गेल्या १५ दिवसांपासून सदा ढावरेला कुणाकुणाचे फोन येत होते, हे तपासण्यासाठी ढावरेचा ‘सीडीआर’ काढण्यात यावा, अशी मागणी पोलिस आयुक्तांकडे करणार आहोत.
