पुणे-
पुणे शहरातील कोंढवा परिसरात एका शाळेतील फिजीकल एज्युकेशन(पी.टी.) शिक्षक विद्यार्थीनींना मिठ्या मारुन तसेच चुंबन घेऊन विनयभंग करत असल्याचा धक्कादायक प्रकार समुपदेशनमध्ये उघडकीस आला आहे. हा शिक्षक सदरचा प्रकार मागील दोन ते तीन महिण्यापासून करत होता ही बाब यानिमित्ताने समोर आली आहे. शाळेत झालेल्या समुपदेशनाच्या दरम्यान अल्पवयीन चार विद्यार्थीनींनी हा प्रकार समुपदेशक यांना सांगितला आहे. यानंतर संबंधीत शिक्षकाची शाळेच्यावतीने कोंढवा पोलीस ठाण्यात रीतसर तक्रार दाखल करण्यात आली आहे अशी माहिती पोलिसांनी शनिवारी दिली आहे.
अविनाश गोविंद चिलवेरी ( 23, रा.बिडी कामगार वसाहत, येरवडा,पुणे) असे अटक शिक्षक आरोपीचे नाव आहे. याप्रकरणी शाळेच्यावतीने 37 वर्षीय महिलेने पोलिसांकडे आरोपी विरोधात फिर्याद दाखल केली आहे. याप्रकरणी आरोपी शिक्षक चिलेवार विरुध्द विनयभंगसह पॉस्को अंतर्गत ही गुन्हा दाखल करण्यात आला आहे.
पोलिसांनी दिलेल्या माहितीनूसार, कोंढव्यामध्ये एक इंग्रजी माध्यमाची नामांकित शाळा आहे. आरोपी चीलवेरी तेथे सात ते आठ महिण्यापुर्वीच पी.टी.शिक्षक म्हणून रुजू झाला होता. तो मागील दोन महिण्यांपासून तेथील विद्यार्थीनींना जबरदस्ती मिठी मारुन चुंबन घेत होता. तसेच त्यांना व्हॉटसअपव्दारे आयलव्हयू मेसेजही पाठवत होता.
हा प्रकार नोव्हेंबरपासून सुरु होता अशी माहिती विद्यार्थिनींनी दिली आहे. दरम्यान नुकत्याच झालेल्या शाळेतील समुपदेशान दरम्यान शाळेतील चार मुलींनी हा धक्कादायक प्रकार समुपदेशकांना सांगितला. त्यांनी ही बाब शाळेच्या शिक्षीकेच्या निदर्शनास आणून दिली.त्यानंतर शाळेने याबाबत मुलींकडे चौकशी करून दोषी शिक्षका विरोधात तक्रार पोलिसांकडे दिली आहे. याबाबत पुढील तपास कोंढवा पोलीस ठाण्याचे पोलिस करत आहे.
