पुणे-बंडखोर आमदार प्रताप सरनाईक यांच्यावरील ईडीची केस मागे घेण्याची तयारी सुरू आहे. त्यासाठी क्लोजर रिपोर्ट सादर केला गेला. त्यावरून राष्ट्रवादीच्या खासदार सुप्रिया सुळे यांनी भाजपवर जोरदार हल्लाबोल केला आहे. भाजपने सरनाईक आणि राज्याची माफी मागावी, भाजपने देशासमोर राज्याची प्रतिमा खराब केल्याचा आरोपही यावेळी सुप्रिया यांनी केला, पुण्यात त्या पत्रकारांशी बोलत होत्या.
पुढे सुप्रिया सुळे म्हणाल्यात की, भाजपने ब्लॅकमेल केल्यामुळेच सरनाईक शिंदेंसोबत गेले. आज तुम्ही म्हणता की, आमच्याकडे काही पुरावेच नाही, मग तुम्ही पहिल्यांदा त्यांच्यावर आरोप केले ते खोटे होते का? याची कबूली दिली पाहिजे. त्यामुळे भारतीय जनता पक्षाने सरनाईक कुटुंबियांची हात जोडून माफी मागावी. जर त्यांच्यावर झालेले आरोप खोटे असतील तर त्यांनी देशासमोर महाराष्ट्राची माफी मागावी, अशी मागणी सुळे यांनी केली.
पुढे सुळे म्हणाल्या की, ज्यांच्यावर खोटे आरोप झाले, नंतर ते सरकारमध्ये गेलेत त्यानंतर त्यांना क्लिनचीट मिळाली, त्यामुळे त्यांच्यावर खोटे आरोप झाले की, ब्लॅकमेल करण्यात आले, याला राजकारण म्हणत नाही, असा टोलाही यावेळी सुळेंनी भाजपवर लगावला.
शिवसेनेतून बंड केल्यानंतर शिंदे गटात गेलेले आमदार प्रताप सरनाईक यांना मोठा दिलासा मिळाला आहे. मुंबई पोलिसांच्या आर्थिक गुन्हा अन्वेषण विभागाने टॉप सिक्युरिटी घोटाळा प्रकरणात कोर्टात क्लोजर रिपोर्ट सादर केला. त्यानंतर आता ईडीदेखील याच अहवालाच्या आधारे क्लोजर रिपोर्ट सादर करणार असल्याची चर्चा आहे. तपासात प्रगती होत नसल्याने क्लोजर रिपोर्ट सादर करण्यात आला आहे.
टॉप्स सिक्युरीटीज प्रकरणी मुंबई पोलिसांच्या आर्थिक गुन्हे शाखेकडून सी समरी रिपोर्ट सादर करण्यात आला आहे. आरोप सिद्ध करण्यासाठी पुरेसे पुरावे नसल्याचे पोलिसांनी म्हटले. याच रिपोर्टच्या आधारावर अटकेत असलेल्या आरोपींनी ईडीच्या कारवाईविरोधात कोर्टात अर्ज केला आहे. अमित चांदोले आणि टॉप्स सिक्युरीटीचे माजी संचालक शशिधरन यांनी कोठडीला विरोध करत आता दोषमुक्तीसाठी अर्ज केला आहे.
साल 2014 एमएमआरडीएला 350 ते 500 सुरक्षा रक्षक पुरविण्याचे कंत्राट टॉप्स ग्रुप या कंपनीला मिळाले होते. मात्र या सुरक्षा रक्षक कंत्राटबाबत गैरप्रकार झाला आणि त्याचा आर्थिक फायदा प्रताप सरनाईक आणि अमित चांदोले यांनी घेतला, अशी तक्रार कंपनीच्या एका माजी कर्मचाऱ्यानं केली होती. या कंत्राटात कोट्यवधींचा घोटाळा झाल्याच्या आरोप ठेऊन मनी लॉंड्रिंग कायद्यांतर्गत टॉप्स ग्रुपच्या माजी व्यवस्थापकीय संचालक एम. शशिधरन यांना ईडी कडून अटक करण्यात आली आहे. तर ईडीने आमदार सरनाईक यांच्या घरावर तसेच कार्यालयात धाडी टाकून कुटुंबियांची चौकशी यापूर्वीच केली आहे. यात सरनाईकांचे निकटवर्तीय अमित चांदोले यांनाही ईडीने अटक केली आहे.
दरम्यान जामीन मिळावा म्हणून एम. शशिधरन आणि अमित चांदोले या दोघांनी सत्र न्यायालयात अर्ज केला आहे. त्यावर न्यायाधीश एम. जी. देशपांडे यांच्या समोर सुनावणी पार पडली. दंडाधिकारी न्यायालयाने या प्रकरणात सी समरी रिपोर्ट स्वीकारला असून आपल्याला जामीन देण्यात यावा अशी मागणी शशिधरन आणि चांदोले या दोघांनी न्यायालयाकडे केली. त्यांची बाजू ऐकून घेत न्यायालयाने ईडीला उत्तर सादर करण्याचे आदेश देत सुनावणी 21 सप्टेंबर रोजी निश्चित केली आहे
