पुणे-महिलांसाठी रोजगारनिर्मिती साठी भाजप प्रयत्नशील असून भगिनींना छोट्या छोट्या उद्योगांच्या माध्यमातून स्वावलंबी करणे आणि त्यांच्या उत्पादनांना बाजारपेठ उपलब्ध करून देण्यासाठी आम्ही कटिबद्ध आहोत असे भाजपचे शहर अध्यक्ष योगेश गोगावले म्हणाले.नुकत्याच आयोजित केलेल्या स्वदेशी वस्तूंच्या बाजाराचा उल्लेख करून त्यांनी सांगितले कि ह्या बाजारात छोट्या व्यावसायिकांचा मोठा धंदा झाला,अगदी आकाशकंदील बनविणाऱ्या महिला गटाने पस्तीस हजाराचा धंदा केल्याचे त्यांनी सांगितले.
नगरसेविका मंजुश्री खर्डेकर आणि क्रिएटीव्ह फाउंडेशन ने आयोजित केलेल्या ” माझी दिवाळी स्वदेशी दिवाळी ” या मोहिमेच्या शुभारंभ प्रसंगी ते बोलत होते.यावेळी खिलारेवाडी येथे मोठ्या संख्येने महिला व इतर नागरिक उपस्थित होते,यावेळी वस्तीतील नागरिकांना पतंजली चे हळदी चंदन साबण,दंतकांती टूथ पेस्ट आणि केश कांती शाम्पू चे सॅशे भेट देऊन या मोहिमेचा प्रारंभ करण्यात आला.या उपक्रमाच्या संयोजिका नगरसेविका मंजुश्री खर्डेकर यांनी या उपक्रमामागची भूमिका स्पष्ट करताना सांगितले कि ” विदेशी वस्तूंनी आपली बाजारपेठ व्यापली असून,चीन वरून येणार दुय्यम प्रतीचा माल स्वस्तात आपल्या गळ्यात मारण्यात येतो,हे छुपे युद्ध असून आपण त्यांच्या वस्तू विकत घेतल्याने त्यांची दिवाळी होते पण आपल्या छोट्या व्यावसायिकांचा रोजगार बुडतो,त्यामुळे कोणत्याही वस्तू घेताना त्या भारतीय बनावटीच्या आहेत याची खात्री करूनच विकत घ्या.स्वदेशीचा वापर ही लोकचळवळ झाली पाहिजे असे ही त्या म्हणाल्या.असे कार्यक्रम कोथरूड मध्ये सर्वत्र आयोजित करणार असल्याचे क्रिएटीव्ह फाउंडेशनचे अध्यक्ष संदीप खर्डेकर यांनी सांगितले,स्वा.सावरकरांनी ज्याप्रमाणे विदेशी कापडाची होळी केली तशीच चळवळ पुन्हा उभी करणे गरजेचे आहे असे ही ते म्हणाले.
नगरसेवक दीपक पोटे यांनी स्वदेशीच्या वापराची आवश्यकता विशद करताना आपल्याकडे बनणाऱ्या वस्तू ही दर्जेदार असल्याचे सांगितले.यावेळी भाजपचे विस्तारक पुनीत जोशी,राजेंद्र येडे,बाळासाहेब धनवे,महेश पोटे,चंद्रप्रभा खिलारे,स्वातीताई हिर्लेकर,एड प्राची बगाटे,अनुराधा एडके,हनुमान पवार,लाला कानगुडे,सुनील अभंगे,राज तांबोळी,अक्षय कुलकर्णी,इ मान्यवर उपस्थित होते.
मंजुश्री खर्डेकर यांनी प्रास्ताविक,हनुमान पवार यांनी स्वागत तर संदीप खर्डेकर यांनी सूत्र संचालन केले.
