पुणे-आपल्याला राजकारणात आणि समाजकारणात अनेक जबाबदाऱ्या मिळतात मात्र मिळालेली जबाबदारी यशस्वीरीत्या पूर्ण करणे ही प्रदीपदादा रावत यांचे वैशिष्ट्य असून शिपिंग कॉर्पोरेशन च्या अध्यक्षपदाची जबाबदारी ही दादा रावत समर्थपणे पार पाडतील असे गौरवोदगार अनिल शिरोळे यांनी काढले.क्रीएटिव्ह फौंडेशन आयोजित कोथरूड नवरात्र उत्सवात आयोजित सत्कार समारंभात ते बोलत होते.आमदार मेधा कुलकर्णी या खरोखरच रणरागिणी आमदार असुन त्या संवेदनशील आहेत या संदीप खर्डेकर यांच्या भाषणातील वाक्याचा संदर्भ देत त्यांनी आ मेधा कुलकर्णी यांचा ही मराठी भाषा संवर्धन समितीच्या अध्यक्षपदी निवड झाल्याबद्दल सत्कार केला व भावी कारकिर्दीसाठी शुभेच्छा दिल्या.तसेच भाजपच्या पुणे शहराच्या पहिल्या महापौर हा मान मुक्ता टिळक यांनी मिळविला असुन त्या शहराच्या विकासासाठी कटिबद्ध राहतील असा विश्वास अनिल शिरोळे यांनी व्यक्त केला.
कोथरूड नवरात्र महोत्सवात आज फक्त महिलांसाठी लावणीचा कार्यक्रम आयोजित करण्यात आला होता.यावेळी महापौर मुक्ता टिळक व खा अनिल शिरोळे यांच्या हस्ते प्रदीप रावत तसेच मेधा कुलकर्णी यांचा सत्कार करण्यात आला.
यावेळी महोत्सवाचे संयोजक संदीप खर्डेकर,नगरसेविका मंजुश्री खर्डेकर,विशाल भेलके,मंदार बलकवडे व उमेश भेलके उपस्थित होते.
महापौर मुक्ता टिळक यांनी प्रदीप रावत आणि मेधा कुलकर्णी यांचा गौरव करतानाच ” आपण शहर विकासासाठी कार्यरत असून विशेषत: महिलांसाठी आपण लवकरच महापौर बचत बाजार सुरु करणार असून या द्वारे उद्योजक महिलांना त्यांच्या उत्पादनासाठी योग्य बाजारपेठ उपलब्ध होइल असे ही त्या म्हणाल्या.
आज ललिता पंचमी च्या दिवशी मुलींचे पूजन केले जाते,याच बरोबर सर्व महिलांनी आपल्या मुलांना शिक्षित आणि संस्कारित करावे असेही त्या म्हणाल्या.आमचा सत्कार करताना जिजाऊ आणि बाल शिवाजी ची प्रतिमा देण्यात आली हे औचित्यपूर्ण असून ज्याप्रमाणे जिजामातानी शिवरायांवर संस्कार केले तसेच संस्कार प्रत्येक आई ने आपल्या मुलांवर करावेत आणि त्याहीपेक्षा मुलांवर असे संस्कार करावेत की महिलांना सुरक्षित वातावरण निर्माण होइल अशी अपेक्षा आ मेधा कुलकर्णी यांनी व्यक्त केली.प्रदीप रावत यांनी या सत्काराबद्दल कृतज्ञता व्यक्त केली व सर्वांना नवरात्रीच्या शुभेच्छा दिल्या.या कार्यक्रमात तनिष्का दुगड या सातवीत शिकणाऱ्या विद्यार्थिनीचा जर्मनीतील मेटल मॅथ्स कॅल्क्युलेशन च्या जागतिक ज्युनियर चॅम्पिअनशिप स्पर्धेत सहभागी होण्यासाठी निवड झाल्याबद्दल सत्कार करण्यात आला,
तत्पूर्वी काल रात्री यशवंतराव चव्हाण नाट्यगृह येथे स्थायी समिती अध्यक्ष मुरलीधर मोहोळ यांच्या हस्ते या महोत्सवाचे उदघाटन करण्यात आले.यावेळी नगरसेवक दीपक पोटे,सुशील मेंगडे,माधुरीताई सहस्त्रबुद्धे उपस्थित होते.
असे महोत्सव हे नागरिकांची सांस्कृतिक भूक भागविण्यासाठी महत्त्वाचे ठरतात असे नमूद करुन आपण कोथरूड सह एकूणच शहराच्या विकासासाठी निधी ची कमतरता भासु देणार नाही व शहराचा अर्थसंकल्प त्याच धर्तीवर समतोल साधणारा आहे असे मुरलीधर मोहोळ म्हणाले.यानंतर आई रिटायर होतीये हे नाटक सादर करण्यात आले.
कार्यक्रमाचे सूत्र संचालन संदीप खर्डेकर यांनी केले तर मंजुश्री खर्डेकर यांनी आभार प्रदर्शन केले.मंदार बलकवडे,उमेश भेलके व विशाल भेलके यांनी स्वागत केले.
