पुणे :माहिती अधिकार कायद्याचा गैरवापर करत त्याद्वारे जमीन लाटणे, जमिनींच्या कागदपत्रात फेरफार, खंडणी, फसवणूक असे तब्बल 12 गुन्हे दाखल असलेला आणि गेल्या दीड वर्षांपासून पोलिसांना हुलकावणी देणारा रवीद्र ब-हाटे याला बुधवारी 16 जुलैपर्यंत पोलीस कोठडीत ठेवण्याचा आदेश विशेष मोक्का न्यायाधीश एस.आर.नावंदर यांनी दिला. दरम्यान, यापूर्वी अटक झालेली रवींद्र ब-हाटेची पत्नी संगिता (वय.49,रा. धनकवडी) आणि वकील सुनील अशोक मोरे (49) यांची न्यायालयीन कोठडीत रवानगी करण्यात आली. तर, मुलगा मयूर याच्या पोलीस कोठडीत दोन दिवस वाढ करण्यात आली आहे.
बराटे एक वर्षाहून अधिक काळ तो फरार होता. त्या कालावधीत आॅनलाईन कुरापती सुरूच असल्याचे पोलीस तपासात निष्पन्न झाले आहे. त्याने कायद्याला सामोरे जाण्याचे टाळून फरार कालावधीत माध्यमांद्वारे स्वत:चे उदात्तीकरण करण्याबरोबरच तपासयंत्रणा, न्यायव्यवस्था, शासनव्यवस्था, साथीदार फिर्यादी यांच्यावर टीका टिप्पणी करून दबाबाखाली ठेवून खच्चीकरण करण्याचा प्रयत्न केल्याचा युक्तीवाद विशेष सरकारी वकील प्रवीण चव्हाण यांनी केला. तो ग्राह्य धरून त्याला पोलीस कोठडी सुनावण्यात आली.
ब-हाटे याचा शोध घेण्यासाठी गेल्या काही महिन्यांपासून शहर पोलीस दलाचे अखंड प्रयत्न सुरु होते. त्याच्या घरावर पोलिसांनी छापा घातला होता. त्यावेळी त्याच्याकडे मोठ्या प्रमाणावर जमिनीची कागदपत्रे, अनेक कोरे धनादेश सापडले. त्यांची मालमत्ता सुमारे २ हजार कोटी रुपयांपर्यंत असल्याचे आढळून आले होते.मात्र तो पोलिसांना गुंगारा देत होता. पुण्यातून तो पळून जाताना मावळ तालुक्यातील एकाची दुचाकी घेऊन पसार झाला होता. त्यानंतर पुणे परिसरात काही काळ लपून बसला होता. त्यानंतर तो सोलापूर, सातारा या भागात काही ओळखीच्या लोकांकडे राहिला. त्यानंतर तो गुजरात, हैद्राबाद, कर्नाटक या राज्यात गपचूप वेगवेगळ्या ठिकाणी फिरत होता.नुकतीच त्यांची पत्नी संगीता, मुलगा मयुर यांच्याबरोबर पिंताबर धिवार, अॅड. सुनिल मोरे यांना अटक केली होती. पोलिसांनी त्याच्याविरोधात चारी बाजूने फास आवळत आणला होता. त्यामुळे सर्व मार्ग बंद होत असल्याचे दिसल्यावर रवींद्र ब-हाटे पोलिसांना शरण गेला. त्यानुसार मंगळवारी (दि.6) दुपारी तो पोलीस आयुक्तालयात आला. पोलिसांनी त्याला अटक केली. बुधवारी त्याला न्यायालयात हजर करण्यात आले.
बऱ्हाटेने फेसबुकवरकाही दिवसांपुर्वी पहिल्यांदा व्हिडीओ अपलोड केला. त्यानुसार पोलिसांनी तांत्रिक विश्लेषणाद्वारे त्याच्या संपर्कात असलेल्यांची माहिती गोळा करण्यास आली. त्यामध्ये सर्व व्हिडीओ व ऑडीओ तयार करून प्रसारीत करण्याच्या कामात आरोपी पितांबर धिवार याने बऱ्हाटेला मदत केल्याचे तपासात निष्पन्न झाल्यामुळे त्याला अटक केली. दरम्यान, बऱ्हाटेने फेसबुकवर अपलोड केलेले व्हिडीओ सातत्याने पाहणे, लाईक आणि शेअर करणाऱ्यांची संख्या 9 वर पोहोचली होती. त्यामुळे बऱ्हाटे आणि संबंधित 9 फॉलोअर्स यांचा संबंध काय होता, याची तपासणी गुन्हे शाखेकडून करण्यात येत आहे.
