पुणे : बंदिवान म्हणून कारागृहात असलो तरी बंदीजनांसाठी जगत्गुरू तुकाबारायांच्या नावाने कारागृहात स्पर्धा घेतल्या, या स्पर्धेत आम्हाला सहभागी होता आले यामुळे कारागृहातच विठुरायाचे दर्शन झाल्याची प्रचिती मिळाली अशी भावना व्यक्त केल्या आहेत, कोल्हापूर जिल्हा कारागृहातील बंदीजनांनी. संत रचनांनंतर ‘माणूस होऊन राहिन मी’ या सादर करण्यात आलेल्या स्वरचित भजनाने भावनिकतेचा कळस गाठला.
शरद क्रीडा व सांस्कृतिक प्रतिष्ठानतर्फे देशाच्या स्वातंत्र्याचा अमृतमहोत्सव आणि संस्थेच्या रौप्यमहोत्सवाचे निमित्त साधून कारागृहातील बंदिजनांसाठी जगद्गुरू श्री संत तुकाराम महाराज राज्यस्तरीय अभंग व भजन स्पर्धाचे आयोजन करण्यात आले आहे. आज कोल्हापूर जिल्हा कारागृहातील बंदीजनांनी आपले सादरीकरण करीत उपस्थितांची वाहवा मिळविली. कारागृह निरीक्षक जयवंत भोसले, शरद क्रीडा आणि सांस्कृतिक प्रतिष्ठानचे अध्यक्ष आणि स्पर्धा प्रमुख लक्ष्मीकांत खाबिया, उपाध्यक्ष नंदकुमार बंड, हभप अच्युत महाराज कुलकर्णी, विश्वस्त विवेक थिटे, संजीव मिसाळ, शंकर धुमाळ आदी उपस्थित होते.
स्पर्धेविषयी बंदीजनांमध्ये उत्सुकता दिसून आली. संतश्रेष्ठ ज्ञानेश्वर महाराजांनी रचलेल्या ‘देवाचिये द्वारी, उभा क्षणभरी’ या अभंगाच्या सादरीकरणाने स्पर्धेला सुरुवात झाली. त्यानंतर संत एकनाथ महाराजांचा ‘ज्या सुखा कारणे देव वेडावला’ आणि अखेरीस संत तुकाराम महाराज यांचा ‘कुठे शोधू जीवाला विसावा’ हा अभंग सादर केला.
बंदीजनांनी एक स्वरचित रचना सादर करावी, अशीही स्पर्धेची एक अट होती. याला अनुसरून ‘माणूस होऊन राहिन मी, व्यसनाचा नाद आयुष्य बरबाद करी, वाईटाची साथ नको आता’ ही समाजप्रबोधनपर रचना सादर करण्यात आली. या रचनेस उपस्थितांनी भरभरून दाद दिली.
बंदीजनांमध्ये निश्चितच सुधारणा होईल
शरद क्रीडा व सांस्कृतिक प्रतिष्ठानने आयोजित केलेल्या अभंग-भजन सादरीकरण स्पर्धेमुळे बंदीजनांमध्ये भक्तीरस वाढीस लागून अध्यात्माच्या माध्यमातून चांगले विचार रुजायला आणि त्यांची जडणघडण व्हायला निश्चितच उपयोग होईल. कारागृहातून बंदीजन बाहेर गेल्यानंतर आयुष्याची भविष्यातील वाटचाल चांगल्या मार्गाने करतील असा विश्वास वाटतो.
जयवंत भोसले, कोल्हापूर कारागृह निरीक्षक
घडले विठुरायाचे दर्शन
कारागृहातील बंदीजनांसाठी आयोजित केलेल्या स्पर्धेचा बंदीजनांच्या मानसिकतेवर सकारात्मक परिणाम झाल्याचे दिसून आले. वारीत सहभागी न होताही येथेच आम्हाला विठुरायाचे दर्शन झाले, अशा भावना बंदीजनांनी व्यक्त केल्या.
महाअंतिम फेरीत प्रथम क्रमांक पटकाविणार्या संघास ज्ञानोबा-तुकाराम महाकरंडक आणि प्रमाणपत्र, द्वितीय क्रमांकास राष्ट्रसंत तुकडोजी महाराज महाकरंडक आणि प्रमाणपत्र तर तृतीय क्रमांकास संत शेख महंमद महाकरंडक आणि प्रमाणपत्र देण्यात येणार आहे. स्पर्धकांना आणि स्पर्धक संघांना सहभाग प्रमाणपत्र देण्यात येणार आहे.
स्व. सौ. कमलाबाई रसिकलाल धारीवाल यांच्या स्मरणार्थ संघांना साहित्यभेट
स्पर्धेत सहभागी झाल्याबद्दल कारागृहातील संघांला सौ. दिना आणि प्रकाश धारीवाल यांच्या वतीने स्व. सौ. कमलाबाई रसिकलाल धारीवाल यांच्या स्मरणार्थ हार्मोनियम, तबला, पखवाज, 10 जोडी टाळ, तुकोबांच्या अभंगाची पाच फूट बाय पाच फूट आकाराची फे्रम व प्रबोधनात्मक तसेच प्रेरणायादी 82 पुस्तकांचा संच देण्यात आला.
