राहुल नार्वेकर विधानसभेचे नवे अध्यक्ष:164 मते मिळवून भाजप-शिंदे गटाचा विजय

मुंबई- महाराष्ट्र विधानसभेच्या अध्यक्षपदी भाजपाच्या राहुल नार्वेकरांची  यांची निवड झाली आहे. मोठ्या गदारोळात हे मतदान पार पडलं. भाजपकडून राहुल नार्वेकर तर महाविकास आघाडीकडून शिवसेनेचे राजन साळवी निवडणूक मैदानात उतरले होते. या लढतीत नार्वेकर यांनी बाजी मारली. नार्वेकरांना बहुमतापेक्षा जास्त म्हणजे १६४ मते मिळाली आहेत.

विधानसभा अधिवेशनाचे कामकाज सुरु होताच राहुल नार्वेकर यांची अध्यक्षपदी निवड करावी असा प्रस्ताव भाजपाकडून चंद्रकांत पाटील यांनी मांडला गिरीश महाजन यांनी त्याला अनुमोदन दिलं. महाविकास आघाडीकडून चेतन तुपे यांनी राजन साळवी यांचा प्रस्ताव मांडला संग्राम थोपटे यांनी त्याला अनुमोदन दिलं. आवाजी मतदान पद्धतीलाच मविआने आक्षेप घेतला. त्यामुळे आता आमदारांची शिरगणती करुन अध्यक्ष निवडला गेला. या प्रक्रियेसाठी विधानसभेच्या सभागृहाचे दरवाजे प्रक्रीया संपेपर्यंत दरवाजे बंद करण्यात आले होते.

समाजवादी पक्षाचे आमदार अबु आझमी व रईस शेख तटस्थ राहिले. एमआयएमचे आमदारही तटस्थ राहिले. त्यांनी मविआ उमेदवाराला मत दिले नाही.

राहुल नार्वेकर यांनी बहुमताचा आकडा पार केला आहे. अध्यक्षपदासाठी त्यांना 164 आमदारांनी मतदान केले.

मतदानासाठी आदित्य ठाकरे यांनी पूर्ण नाव सांगताना आईचेही नाव उच्चारले.

विधानभवनात दाखल होण्यापुर्वी एकनाथ शिंदे गटाकडून बाळासाहेब ठाकरेंच्या पुतळ्याला अभिवादन. एकनाथ शिंदेंसह सर्व बंडखोर आमदार विधानभवनात दाखल

महाराष्ट्राचा इतिहास पाहता सर्वांत तरुण असा अध्यक्ष महाराष्ट्र विधानसभेला मिळाला आहे. राहुल नार्वेकर हे 45 वर्षांचे आहेत. भाजप-शिंदे गटाला 164 मते पडली आहेत. तर मविआ उमेदवार राजन साळवी यांना 107 मते पडली आहेत. समाजवादी पक्षाचे दोन आमदार आणि एमआयएमचा एक आमदार तटस्थ राहिले आहेत. राहुल नार्वेकर यांची विधानसभा अध्यक्षपदी निवड झाल्यानंतर सभागृहात ‘जय श्रीराम’च्या घोषणा देण्यात आल्या. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी राहुल नार्वेकर यांना खुर्चीपर्यंत नेले.

विधानसभेच्या दोनदिवसीय विशेष अधिवेशनाला आजपासून सुरुवात झाली आहे. या अधिवेशनात आज विधानसभा अध्यक्षांची निवडीसाठी मतदान झाले. यावेळी राहुल नार्वेकर यांनी 57 मतांनी मविआचे उमेदवार राजन साळवी यांचा पराभव केला. यापूर्वी महाराष्ट्राचे विधानसभा अध्यक्ष काँग्रेस नेते नाना पटोले हे होते.

 राहुल नार्वेकर हे कुलाब्याचे आमदार आहेत. 2014 मध्ये त्यांना शिवसेनेने लोकसभेला उमेदवारी नाकारल्याने त्यांनी राष्ट्रवादीत प्रवेश केला होता. त्यानंतर त्यांनी मावळ मतदार संघातून लोकसभा निवडणूक लढविली होती. मात्र त्यांना शिवसेनेच्या श्रीरंग बारणेंकडून पराभवाचा सामना करावा लागला. यानंतर 2019 च्या विधानसभा निवडणुकांच्या तोंडावर त्यांनी भाजपची वाट धरली होती. सेनेत असताना आदित्य ठाकरे यांचे निकटवर्तीय मानले जात होते.

कुटुंबही राजकारणात
राहुल नार्वेकर हे विधान परिषदेचे सभापती रामराजे नाईक निंबाळकर यांचे जावई आहेत. तर राहुल यांचे वडील सुरेश नार्वेकर कुलाबा भागातील नगरसेवक होते. तर भाऊ मकरंद नार्वेकर प्रभाग क्रमांक 227 मधून दुसऱ्यांदा नगरसेवक आहेत. राहुल यांच्या वहिनी हर्षिता नार्वेकर या प्रभाग क्रमांक 226 मधून नगरसेविका आहेत.

शिंदे सरकार परीक्षेत पास
महाराष्ट्राच्या राजकारणात झालेल्या उलथापालथीनंतर राज्यात शिंदेशाहीला सुरुवात झाली आहे. नव्याने स्थापन झालेल्या शिंदे सरकारला 4 तारखेला बहुमत चाचणीला सामोरे जावे लागणार आहे. मात्र, शिंदे सरकारची खरी परीक्षा आज होती. कारण, अध्यक्षपदाची निवड झाल्यानंतर विश्वासदर्शक ठराव मांडला जाणार आहे. अध्यक्षपदाच्या निवडणुकीत सरकारने बाजी मारल्यानंतर शिंदे सरकारचे विधानसभेतील बहुमत सिद्ध झाले. त्यानंतर उद्या विश्वासदर्शक ठराव ही औपचारिकता असेल. त्यामुळे शिंदे सरकारची खरी परीक्षा आज झाली.

आतापर्यंतचे विधानसभा अध्यक्ष