पुणे- जय भवानी, जय शिवाजीचा नारा देत नवजागृती मित्र मंडळाचे कार्यकर्ते लोहगडावर पोहचले आणि सर्वाधिक उंच असलेल्या विंचु कड्यावर भगवा ध्वज फडकाविला. शिवजयंतीच्या निमित्ताने आयोजित या कार्यक्रमात जय भवानी, जय शिवाजी आणि छत्रपती शिवाजी महाराजांच्या जयघोषांनी सारा आसमंत दुमदुमून गेला होता.
नवजागृती मित्र मंडळ हे पुण्यातील सोमवार पेठेतील असून मंडळाचे अध्यक्ष राहुल शर्मा यांच्या नेतृत्वाखाली हा ध्वजारोहणाचा कार्यक्रम झाला. याप्रसंगी औंढेचे माजी सरपंच अर्जुन पाठारे, लोहगडचे माजी सरपंच गणेश धानीवले, नवजागृती मित्र मंडळाचे पंकज अगरवाल, अनुपम गवारे, अक्षय बारस्कर, प्रतीक सराफ, जगनाथ लोखंडे, प्रशांत सराफ, निमिष अगरवाल व इतर कार्यकर्ते उपस्थित होते.
नवीन पिढीला छत्रपती शिवाजी महाराजांचा इतिहास समजावा यासाठी या इतिहासाचे साक्षीदार असलेले गडकिल्ले पाहण्यासाठी औंढे व औंढोली जिल्हा परिषद शाळेतील विद्यार्थ्यांनाही किल्ल्यावर नेण्यात आले होते. मंडळाच्या वतीने विद्यार्थ्यांची सर्व व्यवस्था करण्यात आली होती, अशी माहिती अध्यक्ष राहुल शर्मा यांनी दिली.
