पुणे-शास्त्रीय नृत्य व शास्त्रीय गायन यांचा मनोहारी मिलाफ असणारा ‘नूपुर नाद महोत्सव’ यंदा शनिवार, दि. 25 मे 2019 रोजी सायंकाळी 5 वाजता कोथरूड येथील डॉ. शामराव कलमाडी प्रशालेतील शकुंतला शेट्टी सभागृह येथे आयोजित करण्यात आला आहे. विख्यात भरतनाट्यम् नृत्यांगना व अभिनेत्री बंगलोरच्या रूक्मिणी विजयकुमार यांचे बहुचर्चित ‘अभिमता’ एकल नृत्यनाट्य आणि प्रख्यात शास्त्रीय गायक पं. संजीव अभ्यंकर यांचे सुरेल गायन यांचा हा कार्यक्रम ‘नूपुर नाद’ आणि श्री शिवसाम्राज्य प्रतिष्ठान यांच्या संयुक्त विद्यमाने आयोजित करण्यात आला आहे. या ‘नूपुर नाद’ महोत्सवाचे यंदाचे तिसरे वर्ष आहे. यास प्रवेशमूल्य आहे.
भरतनाट्यम् नृत्यांगना डॉ. स्वाती दैठणकर व संतूरवादक डॉ. धनंजय दैठणकर यांच्या संकल्पनेतून साकारलेल्या नूपुर नाद महोत्सवात यापूर्वी पं. शिवकुमार शर्मा, मालविका सरूक्काई, पं. सुरेश तळवलकर, पं. उल्हास कशाळकर, राहुल शर्मा, जयतीर्थ मेकुंडी, प्रवीण गोडखिंडी, अलरमेल वल्ली, व्यंकटेश कुमार सारख्या दिग्गज कलाकारांनी आपली कला रसिकांच्या भरघोस प्रतिसादात सादर केली आहे.
