पटियाला – प्रसिद्ध पंजाबी गायक दलेर मेहंदी याला पोलिसांनी अटक केली आहे. 2003 मध्ये दलेर मेहंदीवर मानवी तस्करीद्वारे बहुसंख्य व्यक्तींना अमेरिकेत पाठवल्याचा गुन्हा दाखल करण्यात आला होता. दलेर आणि त्याचा भाऊ शमशेर या दोघांनी 10 लोकांना परदेशात ठेवल्याचा आरोप आहे. यामध्ये दलेर मेहंदीला 2 वर्षे तुरुंगवासाची शिक्षा सुनावण्यात आली होती. त्याने या शिक्षेला पटियालाच्या सत्र न्यायालयात आव्हान दिले होते. तेथेही शिक्षा कायम राहिल्याने गुरुवारी त्याला अटक करण्यात आली. दलेरला आता शिक्षा भोगण्यासाठी पटियाला सेंट्रल जेलमध्ये पाठवण्यात येणार आहे. माजी क्रिकेटपटू नवज्योत सिद्धूही याच तुरुंगात आहेत.
ट्रायल कोर्टाने सुनावली होती शिक्षा
2003 मध्ये दलेर मेहंदीविरोधात गुन्हा दाखल करण्यात आला होता. 2018 मध्ये, पटियालाच्या न्यायदंडाधिकारी न्यायालयाने सुमारे 15 वर्षांच्या सुनावणीनंतर त्याला दोन वर्षांचा कारावास आणि 2,000 रुपये दंडाची शिक्षा सुनावली होती. 3 वर्षांपेक्षा कमी शिक्षा झाल्यामुळे दलेर मेहंदीला त्याचवेळी जामीन मिळाला. या प्रकरणात आरोपी बुलबुल मेहताची निर्दोष मुक्तता करण्यात आली. दरम्यान दलेर मेहंदीचा भाऊ शमशेर सिंग आणि ध्यानसिंग यांचा मृत्यू झाला आहे.
सत्र न्यायालयाने याचिका फेटाळली
दलेर याने ट्रायल कोर्टाच्या निर्णयाला पटियाला सत्र न्यायालयात आव्हान दिले होते. गुरुवारी झालेल्या सुनावणीदरम्यान अतिरिक्त सत्र न्यायाधीश एचएस ग्रेवाल यांनी दलेरची याचिका फेटाळून लावली. त्यानंतर दलेरला तेथून अटक करण्यात आली.
दलेरवर मानवी तस्करी केल्याचा आरोप
दलेर मेहंदी आपल्या म्युझिक टीमसोबत लोकांना परदेशात पाठवत आणि त्याबदल्यात मोठी रक्कम मिळवत होता, असा आरोप आहे. परदेशात गाण्याचा कार्यक्रम झाल्यानंतर भारतातून नेलेल्या व्यक्तींना तो तिकडेच सोडून येत असे, असे म्हटले जाते. याप्रकरणी पहिला गुन्हा 2003 मध्ये अमेरिकेत दाखल करण्यात आला होता. मानव तस्करीद्वारे बहुसंख्य व्यक्ती अमेरिकेतच पाठवण्यात आले. दलेर आणि शमशेर या बंधूंनी 1998-99 मध्ये 10 लोकांना परदेशात ठेवल्याचा आरोप आहे. दलेर मेहंदीविरोधात एकूण 31 प्रकरणी आरोप होते. अवैधरित्या लोकांना परदेशात पाठवल्याचा आरोप दलेर मेहंदीवर होता. मानव तस्कर प्रकरण हे 2003 मधील असून, तब्बल 15 वर्षांनी दलेर मेहंदी दोषी ठरला. त्याला गुन्हेगारी कट रचल्याप्रकरणी दोषी ठरवण्यात आले.
