- कॉंग्रेसच्या नगरसेवकांनी घेतली महापालिका आयुक्तांची भेट.
पुणे- कोरोना प्रतिबंधात्मक उपाय योजनांतर्गत महापालिकेचे ५०० ऑक्सिजन बेड वाढविणे, लसीकरण मोहीम राबविणे व रेमडेसिवीर व तत्सम इंजेक्शन खरेदीबाबत कॉंग्रेसच्या नगरसेवकांनी आज महापालिका आयुक्त विक्रम कुमार यांची भेट घेऊन चर्चा केली.
कोरोना या संसर्गजन्य रोगाने जगभरात थैमान घातले असून आपल्या देशात कोरोनाचा प्रादुर्भाव दिवसेंदिवस वाढत आहेत. कोरोनाची आत्ता असलेली लाट पाहता भविष्यात पुन्हा कोरोनाची जोरदार लाट आल्यास त्यासाठी उपाय योजना वेळीच आखणे गरजेचे आहे.
पुणे शहरात कोरोना रूग्णांना ऑक्सिजन बेड उपलब्ध होत नसून महापालिकेचे ५०० ऑक्सिजन बेड वाढविणे गरजेच आहे. महापालिकेचे ऑक्जिसन बेड वाढविल्यास गरीब रूग्णांना त्याचा फायदा होणार आहे. खाजगी रूग्णालयातील ऑक्सिजन बेडचा खर्च गोरगरीब व सामान्य रूग्णांना परवडत नाही. श्रीमंत रूग्ण घरात देखील ऑक्सिजन विषयक उपचार घेवू शकतात, परंतू गरीब रूग्णांचे हाल होत असल्याने शासकीय व मनपाचे ऑक्सिजन बेड वाढविणे अत्यावश्यक झालेले आहे.
कोरोनाचा वाढता प्रादुर्भावावर नियंत्रण आणणेसाठी लसीकरण हा एकमेव मार्ग सध्या दिसत आहे. सबब पुणे शहरातील सर्वांचे लसीकरण करणे अत्यावश्यक झालेले आहे. ज्या नागरिकांचा लसीचा पहिला डोस झालेला आहे, त्यांना लसीचा दुसरा डोस उपलब्ध होत नाही त्यांना प्राधान्याने दुसरा डोस देणे गरजेचे आहे.
महापालिकेच्या रूग्णालयांतील रूग्णांना रेमडेसिवीर इंजेक्शन उपलब्ध न झाल्याने त्यांच्या नातेवाईकांचे होणारे हाल थांबविण्यासठी रेमडेसिवीर इंजेक्शनची खरेदी करण्यात यावी.
पुणे शहरात ऑक्सिजनचा तुटवडा असल्याने भविष्याचा वेध घेत पुणे शहर ऑक्सिजनसाठी इतर राज्य व शहरांवर अवलंबून राहावे लागणार नाही, यादृष्टीने ५ ऑक्सिजन प्लँन्ट निर्मिती करण्यात यावी अशी मागणी महानगरपालिका आयुक्तांकडे कॉंग्रेसचे गटनेते आबा बागुल, अरविंद शिंदे, अविनाश बागवे, अजित दरेकर, लता राजगुरू, सुजाता शेट्टी, मेहबूब नदाफ यांनी केली आहे.
