पुणे-पंतप्रधान नरेंद्र मोदी पुढील आठवड्यात मंगळवारी (१६ एप्रिल) पुणे मुक्कामी येत असून, त्यांची बुधवारी (१७ एप्रिल) सकाळी अकलूजमध्ये (जिल्हा सोलापूर) प्रचारसभा होणार आहे. मोदींची पुण्यात सभा होणार नसली, तरी पुणे मुक्कामी पश्चिम महाराष्ट्रातील अनेक राजकीय गणिते बदलणार असल्याची चर्चा सुरू झाली आहे. मोदी शुक्रवारी (१२ एप्रिल) नगरमध्ये जाहीर सभा घेणार असून, पाठोपाठ लगेचच पाचच दिवसांत पुन्हा पुण्यात दाखल होणार आहेत. पुणे मुक्कामी मोदी निमंत्रितांशी पश्चिम महाराष्ट्रातील १२ लोकसभा मतदारसंघांचा आढावा घेणार असल्याचे समजते.
गेल्या लोकसभा निवडणुकीप्रमाणे मोदी यांच्या पश्चिम महाराष्ट्रात सभा होणार आहेत. त्या वेळी नगर, सोलापूर आणि पुणे अशा तीन सभा झाल्या होत्या. यंदा मात्र, नगर, सोलापूर (अकलूज) अशा दोन सभा होणार आहेत. मोदी भुवनेश्वर येथील सभा आटोपून पुण्यात रात्री नऊच्या सुमारास दाखल होणार आहेत. राजभवन येथे त्यांचा मुक्काम असेल.
मोदींच्या पुणे मुक्कामाची माहिती पोलिसांना देण्यात आली असून, विशेष सुरक्षा यंत्रणाही येत्या दोन दिवसांत पुण्यात दाखल होणार आहे. मोदी पुणे विमानतळ ते राजभवन तसेच राजभवन ते पुणे विमानतळ असा प्रवास करणार आहेत. गुरुवारी सकाळी आठच्या सुमारास राजभवन येथून मोदी पुणे विमानतळावर जातील. त्यानंतर ते हेलिकॉप्टरने अकलूजला प्रचाराला जातील.
ही सभा आटोपून ते हेलिकॉप्टरने पुणे विमानतळावर दाखल होतील. तेथून ते विमानाने राजकोट येथे पुढील प्रचार सभेसाठी जाणार असल्याची माहिती सूत्रांनी दिली. मोदी यांची पुण्यात सभा व्हावी, अशी भाजप कार्यकर्त्यांची मागणी आहे. मात्र, पुण्याच्या जवळ बारामती लोकसभा मतदारसंघात मोदी यांची सभा घेण्याचा वरिष्ठ नेत्यांकडून प्रयत्न सुरू आहेत.
