पुणे-हेल्मेट सक्तीच्या नावाखाली रस्त्यावर चौका चौकात,टोळकी करून पोलीस नागरिकांना अडवून जाचक पद्धतीने वसुली करीत असल्याची ओरड झाल्यानंतर आता मुख्यमंत्री फडणवीस यांनी रस्त्यावर असा कारभार नको अशी भूमिका घेत घरी जावून वसुली करा अशी भूमिका घेतली आहे.पुण्यातील आमदारांच्या भेटी नंतर त्यांना दिलेले आश्वासन आणि मुख्यमंत्र्यांनी माध्यमांना दिलेली माहिती यातून फडणवीस यांनी घुमजाव केल्याचे स्पष्ट झाले आहे.एकंदरीत या प्रकरणात जरी घरी जावून वसुली करा म्हटले असले तरी , सीसीस टीव्ही ,चलन करणे ..घरी धडकने यासाठी लागणारी तांत्रिक यंत्रणा ,आणि पोलिसी मानसिकता पुणे पोलिसात आहे किंवा नाही याबाबत शंका व्यक्त होते आहे. हे मात्र निश्चित झाले आहे पोलीस आयुक्त यांनी स्वतःच्या मर्जीने नाही तर पुण्यातील हेल्मेट सपाटा मुख्यमंत्र्यांच्याच मर्जीने लावला असल्याचा दाट संशय यामुळे निर्माण झाल आहे . लोकसभा निवडणुकीपूर्वी काही काल थांबलेली हि वसुली मतदानानंतर पुन्हा सुरु करण्यात आली ,आणि आता विधानसभेच्या तोंडावर हि वसुली पुन्हा थांबण्याची शक्यता निर्माण झाली असून , निवडणूक झाल्यावर पुन्हा पुणेकरांच्या माना कापण्यासाठी पोलिसाना उभे केले जाईल असे म्हणण्यास वाव आहे.
पुणे पोलिसांनी हेल्मेटसक्ती करून दंडापोटी करोडो रुपये वसूल करण्याचा लावलेला सपाटा मुख्यमंत्री देवेंद्र फडणवीस यांनीच रोखला आहे. यापुढे नागरिकांना रस्त्यात अडवून दंड वसूल न करता मुंबई-नागपूरप्रमाणे ‘सीसीटीव्ही’च्या माध्यमातून चलन फाडावे, अशा स्पष्ट सूचना त्यांनी पोलिसांना दिल्या आहेत. हेल्मेटसक्तीला विरोध नाही. मात्र, या सक्तीच्या नावाखाली पोलिसांकडून नागरिकांना त्रास देण्यात येत असल्याने ‘सीसीटीव्ही’द्वारे कारवाई करण्याचे आदेश दिल्याचे मुख्यमंत्र्यांनी मुंबईत सांगितले.
पुणे पोलिसांकडून हेल्मेटसक्तीची कारवाई जोरात सुरू असून गेल्या पाच महिन्यांत ४५ कोटी रुपये दंड वसूल करण्यात आला आहे. पोलिसांच्या या सुसाट कारवाईमुळे आगामी निवडणुकीच्या पार्श्वभूमीवर धास्तावलेल्या आमदारांनी नागरिकांच्या रोषाचा विचार करून थेट मुख्यमंत्र्यांनाच सक्ती रोखण्याची विनंती केली. पालकमंत्री चंद्रकांत पाटील, आमदार माधुरी मिसाळ, भीमराव तापकीर, जगदीश मुळीक, विजय काळे, योगेश टिळेकर आदींनी विधानसभा अधिवेशनादरम्यान मुख्यमंत्र्यांची भेट घेतली.
शहरातील रस्त्यांवर वाहतूक पोलिस घोळक्याने उभे राहून हेल्मेट कारवाईचा एककलमी कार्यक्रम राबवित आहेत. त्यांच्या या कृतीमुळे वाहतूक नियमनाचा बोजवारा उडाला असून सिग्नल तोडणे, ट्रिपल सीट दुचाकी चालविणे यासारखे प्रकार वाढत आहेत. वाहतूक कोंडीच्या घटनाही नित्याच्या झाल्याने हेल्मेटसक्तीची कारवाई थांबवून वाहतूक नियमनाकडे लक्ष द्यावे, अशी मागणी आमदारांनी मुख्यमंत्र्यांकडे केली. फडणवीस यांनी त्यानंतर पोलिस आयुक्त डॉ. के. व्यंकटेशम यांच्याशी संपर्क साधून त्यांना रस्त्यावर कारवाई न करण्याच्या सूचना दिल्या.
याबाबत फडणवीस यांनी सांगितले की, ‘आमचा हेल्मेटसक्तीला विरोध नाही. मात्र, हेल्मेट सक्तीच्या नावावर नागरिकांना त्रास दिला जातो. पोलिसांचा गट रस्त्यावर उभा राहतो, नागरिकांना अडविले जाते, पर्यायाने रांगा लागतात. पोलिसांकडून अशा प्रकारे सक्तीची अंमलबजावणी करण्यात येत असल्याने नागरिकांना त्रासदायक होते आहे. मुंबई आणि नागपूरमध्ये ‘सीसीटीव्ही’च्या माध्यमातून नियमभंग करणाऱ्यांवर कारवाई करण्यात येते. त्या प्रकारे तंत्रज्ञानाचा वापर करून पुण्यातही कारवाई करावी. रस्त्यांवर कोणालाही थांबविण्यात येऊ नये. नियमभंग करणारे ‘सीसीटीव्ही’त कैद होत असून त्यांच्या घरी दंडाचे ‘चलन’ पाठविण्यात यावे, असे आदेश पोलिस आयुक्तांना दिले आहेत.’ हेल्मेट सक्ती जनहितासाठी आहे. मात्र, या सक्तीने लोकांचा त्रास देणे किंवा त्यांच्या ऑफिसच्या वेळेत त्यांना थांबवून ठेवणे हे सुद्धा योग्य नसल्याचे टिप्पणी मुख्यमंत्र्यांनी केली आहे.
- – माधुरी मिसाळ, आमदार–
शहरात सुरू असलेल्या हेल्मेट सक्तीमुळे नागरिकांमध्ये असंतोष होता. या पार्श्वभूमीवर आम्ही सर्व आमदारांनी मुख्यमंत्री देवेंद्र फडणवीस यांची भेट घेतली व या प्रश्नाला वाचा फोडली. पोलिसांकडून वाहनचालकांवर करण्यात येत असलेली दंडात्मक कारवाई, वाहन परवाना ताब्यात घेणे, अरेरावी करणे, याबाबतची भूमिका या वेळी मांडली.
- – डॉ. के. व्यंकटेशम्, पोलिस आयुक्त-
कायद्यानुसार हेल्मेटची कारवाई सुरू राहील. फक्त त्यामुळे कोणाला त्रास होणार नाही, याची काळजी घेतली जाईल.- डॉ. के. व्यंकटेशम्, पोलिस आयुक्त
