कारागृहातच वसली पंढरी
शरद क्रीडा व सांस्कृतिक प्रतिष्ठान आयोजित अभंग-भजन स्पर्धेत ठाणे कारागृहातील बंदीजनांचे सादरीकरण
ठाणे : भजन-अभंग स्पर्धेमुळे पांडुरंगाच्या जवळ जाण्याची संधी मिळाली असून ठाणे कारागृहातच पंढरपूर वसले आहे, अशा भावना स्पर्धेत सहभागी बंदी गणेश सूर्यवंशी याने व्यक्त केल्या.तर नमाज असो वा भजन; परमेश्वराचे चिंतन करण्याचे ते एक साधन आहे. जगात माणुसकी सारखा दुसरा धर्म नाही, असे युसुफ अन्सारी म्हणाला.
शरद क्रीडा व सांस्कृतिक प्रतिष्ठानतर्फे देशाच्या स्वातंत्र्याचा अमृतमहोत्सव आणि संस्थेच्या रौप्यमहोत्सवाचे निमित्त साधून कारागृहातील बंदीजनांसाठी जगद्गुरू श्री संत तुकाराम महाराज राज्यस्तरीय अभंग व भजन स्पर्धेचे आयोजन करण्यात आले आहे. आज ठाणे जिल्हा कारागृहातील बंदीजनांनी स्पर्धेत सहभाग नोंदवत संतरचनांसह ‘शाळा भरली बंद्यांची इच्छा नसताना त्यांची..’ ही रचना सादर केली.
जिल्हा कारागृह अधीक्षक हर्षद अहिरराव, तरुंग अधिकारी अविनाश गावित, लहू कानदकर, शरद क्रीडा आणि सांस्कृतिक प्रतिष्ठानचे अध्यक्ष आणि स्पर्धा प्रमुख लक्ष्मीकांत खाबिया, उपाध्यक्ष नंदकुमार बंड, हभप अच्युत महाराज कुलकर्णी, ज्ञानेश्वर शिंदे, विश्वस्त विवेक थिटे, संजीव मिसाळ, शंकर धुमाळ, संगीत शिक्षक दर्शन नाईक, शिक्षक गणेश मुटकुळे, एम. डी. भदाने, हमादेव शहाबादकर आदी उपस्थित होते.
प्रत्येक बंदी वाल्याचा वाल्मिकी होऊ दे-हर्षद अहिरराव, अधीक्षक, ठाणे कारागृह
परमेश्वराच्या नामस्मरणात खूप शक्ती आहे. परमेश्वराचे नामस्मरण केल्यामुळे वाल्याचा वाल्मिकी होतो, हे आपण ऐकले आहे. शरद क्रीडा आणि सांस्कृतिक प्रतिष्ठानने आयोजित केलेल्या अभंग-भजन स्पर्धेच्या माध्यमातून प्रत्येक बंदीजनाला मिळू दे आणि कारागृहातून बाहेर जाताना प्रत्येक बंदी वाल्मिकी होऊ दे.
बंदीजनांच्या हाताल काम मिळावे -लक्ष्मीकांत खाबिया, स्पर्धा प्रमुख
तळोजा कारागृहाचा परिसर बघितल्यानंतर हे प्रकर्षाने जाणवते की, येरवडा कारागृहातील बंदीजनांना वेगवेगळी कामे करण्याची आणि त्यातून अर्थार्जन करण्याची संधी निर्माण करून देण्यात आली आहे. तळोजा कारागृहातील बंदीजनांच्या हाताला काम मिळाल्यास त्याचा निश्चितच उपयोग होईल. हातांना काम करण्याची सवय राहिल्यामुळे तुरुंगातून बाहेर पडल्यानंतर त्यांना कुठलीही अडचण येणार नाही असे वाटते.
विजेत्यांना महाकरंडक आणि प्रमाणपत्र
महाअंतिम फेरीत प्रथम क्रमांक पटकाविणाऱ्या संघास ज्ञानोबा-तुकाराम महाकरंडक आणि प्रमाणपत्र, द्वितीय क्रमांकास राष्ट्रसंत तुकडोजी महाराज महाकरंडक आणि प्रमाणपत्र तर तृतीय क्रमांकास संत शेख महंमद महाकरंडक आणि प्रमाणपत्र देण्यात येणार आहे. स्पर्धकांना आणि स्पर्धक संघांना सहभाग प्रमाणपत्र देण्यात येणार आहे.
स्व. सौ. कमलाबाई रसिकलाल धारीवाल यांच्या स्मरणार्थ संघांना साहित्यभेट
स्पर्धेत सहभागी झाल्याबद्दल कारागृहातील संघांला सौ. दिना आणि प्रकाश धारीवाल यांच्या वतीने स्व. सौ. कमलाबाई रसिकलाल धारीवाल यांच्या स्मरणार्थ हार्मोनियम, तबला, पखवाज, 10 जोडी टाळ, तुकोबांच्या अभंगाची पाच फूट बाय पाच फूट आकाराची फेम व प्रबोधनात्मक तसेच प्रेरणायादी 82 पुस्तकांचा संच देण्यात आला.
