पुणे:’प्रेम हेच अंतिम सत्य आहे, बंदुकीच्या नळीतून प्रेमच बाहेर पडले पाहिजे, आणि कवीच्या शब्दांना राजकीय सोयींनी पाहू नये’, असे प्रतिपादन साहित्य अकादमी पुरस्कार विजेते कवी उदय प्रकाश(दिल्ली) यांनी रविवारी केले.
‘ भारतीय साहित्य का नया दौर’ या विषयावर उदय प्रकाश यांच्याशी टिकम शेखावत यांनी संवाद साधला.
‘दकनी अदब फाऊंडेशन ‘आयोजित डेक्कन लिटरेचर फेस्टिव्हलच्या तिसऱ्या दिवशी, रविवार २ फेब्रुवारी रोजी दुपारी पं. नेहरू सभागृह ( घोले रस्ता ) येथे हा कार्यक्रम झाला. रसिकांचा त्याला चांगला प्रतिसाद मिळाला
पहिले महायुद्ध, दुसरे महायुध्द झाले तरी हिंसेने प्रश्न सुटत नाहीत, हे आपल्याला कळलेले नाही. अजूनही कलबुर्गी यांच्यासारख्या लेखकाची हत्या होते आहे. आपल्याच धर्मातील गोष्टींबद्दल लिहिणाऱ्या लेखकाला आपण समजून घेऊ शकत नाही, तर दुसऱ्या धर्मातील लिखाण कधी समजून घेणार ? असा सवालही त्यांनी केला.
हायडेलबर्ग सारख्या विद्यापीठ ज्ञान केंद्रावर महायुध्दात बॉंब पडला नव्हता.
ज्ञानच संपले तर रचनात्मक काहीच शिल्लक राहणार नाही. समाज विकसित होणे म्हणजे त्या समाजातील ‘ सिव्हील सोसायटी ‘ विकसित होणे, हे आपण समजून घेत नाही, अशी खंतही त्यांनी व्यक्त केली.
उदय प्रकाश म्हणाले,’ फेसबुक सारख्या माध्यमांमुळे कविता पोचू लागले आहे. मासिकांनी कविता मागवणे बंद केले आहे. थेट संवाद होवू लागला आहे, एका कवीला दुसरे कवी वाचायला मिळू लागले आहेत. मी आता एका भाषेचा कवी राहिलो नाही, सर्वांचा कवी झालो आहे.
चांगल्या रचना असतील तर त्या सर्वांपर्यंत पोहोचतातच, असा सल्ला त्यांनी दिला. चांगला लेखक जुनी मिथके मोडून काढून, नवी मिथके जन्माला घालतो,कवी विद्रोह मांडतो, तेव्हाही तो एकटा नसतो. अनेक साद, प्रतिसाद त्याच्या प्रवाहात मिळत राहतात,असे निरीक्षण देखील उदय प्रकाश यांनी सांगितले.
संयोजक मोनिका सिंग यांनी उदय प्रकाश यांचा सत्कार केला.
सभागृहात भारत सासणे, गणेश विसपुते, युवराज शहा असे अनेक मान्यवर उपस्थित होते. आर जे तरुण यांनी आभार मानले
या कार्यक्रमा नंतर ‘अनुवाद की दुनिया ‘विषयावर झालेल्या परिसंवादात दामोदर खडसे,सोनाली नवांगुळ, चंद्रकांत भोंजाळ,सेवक अय्यर सहभागी झाले.
