आझम कॅम्पस मध्ये लोकार्पण सोहळा
पुणे: महाराष्ट्र कॉस्मोपॉलिटन एज्युकेशन सोसायटीच्या ‘पी. ए. इनामदार आयसीटी अकॅडमी ‘तर्फे पुणे शहरातील उर्दू माध्यमातील 4 हजार विद्यार्थ्यांना टॅब आणि उर्दू ई -लर्निंग ॲनिमेटेड सॉफ्टवेअरची भेट देण्यात आली . आझम कॅम्पस (पुणे कॅम्प )मध्ये १८ नोव्हेंबर,सोमवारी,सकाळी ११ वाजता उर्दू ई -लर्निंग ॲनिमेटेड सॉफ्टवेअरचा लोकार्पण सोहळा आयोजित करण्यात आला होता. यामुळे उर्दू माध्यमाच्या 4 हजार प्राथमिक विद्यार्थ्यांना ‘टॅब’ आणि ‘उर्दू ई -लर्निंग ‘ सॉफ्टवेअर द्वारे प्रगतीचे पंख लाभले आहेत !
उर्दू माध्यमातील विद्यार्थ्यांसाठी संशोधित करण्यात आलेला भारतातील हा पहिलाच सॉफ्टवेअर उपक्रम आहे.
शिक्षण उप संचालक आणि पुणे पालिकेच्या शिक्षण अधिकारी मीनाक्षी राऊत या कार्यक्रमाला प्रमुख पाहुण्या म्हणून उपस्थित होत्या . महाराष्ट्र कॉस्मोपॉलिटन एज्युकेशन सोसायटीचे अध्यक्ष डॉ पी ए इनामदार हे कार्यक्रमाच्या अध्यक्षस्थानी होते . महाराष्ट्र एज्युकेशन सोसायटीच्या उपाध्यक्ष आबेदा इनामदार, सचिव लतीफ मगदूम,तनवीर इनामदार हे मान्यवर देखील या कार्यक्रमात उपस्थित होते.
महाराष्ट्र कॉस्मोपोलिटन एज्युकेशन सोसायटीच्या ‘पी .ए. इनामदार आयसीटी अकॅडमी ‘ च्या वतीने पुणे महानगरपालिकेच्या आणि आझम कॅम्पस मधील शाळांच्या मिळून एकूण 4 हजार विद्यार्थ्यांना हे उर्दू ॲनिमेटेड ई लर्निंग सॉफ्टवेअर आणि टॅब मोफत दिले गेले. हाजी गुलाम मोहम्मद आझम एज्युकेशन ट्रस्ट चे विश्वस्त तनवीर इनामदार यांनी हे सॉफ्टवेअर तयार केलेले आहे. सॉफ्टवेअर तयार करण्यासाठी आझम कॅम्पस मधील शिक्षकांनी कंटेन्टची मदत केली आहे. सोमवारी सकाळी 11 वाजता आझम कॅम्पसच्या असेम्ब्ली हॉल मध्ये विशेष कार्यक्रमात या सॉफ्टवेअर चे लोकार्पण करण्यात आले .
मीनाक्षी राऊत म्हणाल्या, “२०२० मध्ये भारत महासत्ता करताना मनुष्यबळ निर्मिती हे आव्हान असणार आहे. वंचित, सामाजिक मागास वर्गाला सक्षम करणे आवश्यक असणार आहे. उर्दू माध्यमातून ई -लर्निंग अॅनिमेटेड सॉफ्टवेअर आणि टॅब देणे हा या विद्यार्थांच्या सक्षमीकरणासाठी महत्वाचा उपक्रम ठरू शकतो.तासंतास व्हीडीओ गेम,पबजी खेळणाऱ्या पिढीवर दुष्परिणाम होत आहे. हा तंत्रज्ञानाचा दुरुपयोग आहे.तंत्रज्ञानाचा ई लर्निंगमध्ये उपयोग करुन अभ्यासाची गोडी वाढवणे महत्वाचे आहे. सर्व अभ्यास टॅब द्वारे हातात आल्यावर विद्यार्थी सक्षम होतीलच, पण, शिक्षकांनाही ज्ञानाने अद्ययावत अपडेट व्हावे लागेल. “
डॉ.पी. ए. इनामदार म्हणाले, ‘ गरीब, झोपडपट्टीतील विद्यार्थ्यांना टॅब देण्याने देशभरात प्रगतीचे वारे सुरू होईल. कमी बोलून जास्त काम करण्यावर भर दिला पाहिजे.तंत्रज्ञानाच्या वापराने मनुष्याची उमेद वाढवण्याचे काम आपण केले पाहिजे. ‘
”यापूर्वी , महाराष्ट्र कॉस्मोपोलिटन एज्युकेशन सोसायटी च्या वतीने पुणे महानगरपालिकेच्या २७ शाळांमध्ये ‘पी. ए. इनामदार कॉम्प्युटर लॅब ‘ स्थापन करण्यात आल्या असून तेथील गरीब विद्यार्थ्यांना मोफत संगणक प्रशिक्षण ,इंग्रजी संभाषण ,टायपिंग ,हार्डवेअर दुरुस्ती शिकवली जाते. हे विद्यार्थी एमएस-सीआयटी,ट्रीपल -सी परीक्षा उत्तीर्ण झाले आहेत’, अशी माहिती ‘पी .ए. इनामदार आयसीटी अकॅडमी ‘च्या संचालक मुमताज सय्यद यांनी दिली.गरीब आणि मागास समाजातील विद्यार्थ्यांना प्रगतीचे पंख पुरवायचे असतील तर अत्याधुनिक माहिती- तंत्रज्ञान, संगणक ज्ञान ,संगणक प्रणाली देणे आवश्यक आहे हे उद्दिष्ट डॉ. पी. ए. इनामदार यांनी डोळ्यासमोर ठेवून राज्यभर ७७ कॉम्प्युटर लॅब्स उघडल्या आहेत, त्यातून मोफत संगणक ज्ञान दिले जात आहे ,असेही मुमताज सय्यद यांनी सांगितले.
मुंबईच्या इत्तेहाद स्कूलचे विश्वस्त सिद्दीकी, नासिर खान, उपस्थित होते. शमीम खान यांनी आभार मानले. रोशन आरा यांनी सूत्रसंचालन केले
