पुणे: ‘ पुण्यभूषण फाऊंडेशन’(त्रिदल, पुणे) आणि पुणेकरांच्या वतीने दिला जाणारा ‘ पुण्यभूषण पुरस्कार’ 2018 ज्येष्ठ गायिका डॉ.प्रभा अत्रे यांना देण्यात येणार आहे. हा पुरस्कार त्यांच्या गायन क्षेत्रातील अतुलनीय योगदानासाठी देण्यात येत आहे, अशी माहिती ‘ पुण्यभूषण फाऊंडेशन’चे अध्यक्ष डॉ. सतीश देसाई यांनी पत्रकाद्वारे दिली.
एक लाख रूपये रोख आणि बालशिवाजींची सोन्याच्या फाळाने पुण्याची भूमी नांगरित असलेली प्रतिमा, पुण्याच्या ग्राम देवतांसह असलेल्या या वैशिष्ठपूर्ण स्मृतिचिन्हाने या वर्षीच्या पुण्यभूषण पुरस्कार्थी प्रभा अत्रे रांना गौरविण्यात येणार आहे. हा पुरस्कार पद्मविभूषण डॉ.रघुनाथ माशेलकर यांच्या अध्यक्षतेखालील निवड समितीने देण्याचे ठरविले आहे.
लवकरच हा पुरस्कार पंडीत हरिप्रसाद चौरसिया, पंडीत अमजद अलीखान, पंडीत जसराजजी, पंडीत शिवकुमार शर्मा ह्यांसारख्या त्याच क्षेत्रातील दिग्गजांच्या हस्ते प्रदान करण्यात येणार आहे.
पुरस्काराचे यंदाचे 30 वे वर्ष आहे. या पुरस्काराबरोबर सहा स्वातंत्र्यसैनिकांनाही गौरविण्यात येणार आहे. यामध्ये रघुनाथ गंगाराम लकेश्री, बलबीर सिंग, संदीप बाजीराव उकिरडे, श्रीमती विनीता अशोक कामटे (कै.अशोक कामटे यांच्या वीरपत्नी), दिनदयाळ वर्मा, प्रल्हाद कृष्णराव रेभे यांचा समावेश आहे.
पुण्यभूषण पुरस्कार इतिहास
यापूर्वी ज्येष्ठ गायक पं.भीमसेन जोशी, राजा दिनकर संग्रहालयाचे कै. काका केळकर, शंतनुराव किर्लोस्कर, डॉ. बानुबाई कोयाजी, सुप्रसिद्ध साहित्यिक पु. ल. देशपांडे, शिवशाहीर बाबासाहेब पुरंदरे, योगाचार्य बी. के. एस.अय्यंगार, डॉ. रा. ना. दांडेकर, डॉ. मोहन धारिया, डॉ. जयंत नारळीकर, प्रतापराव उर्फ तात्या गोडसे, ज्येष्ठ क्रिकेटपटू चंदु बोर्डे, कै. जयंतराव टिळक, डॉ. जब्बार पटेल, श्री. राहुलकुमार बजाज, डॉ. के. बी. ग्रँट, विख्यात नृत्यसाधिका डॉ. रोहिणी भाटे, डॉ. बाबा आढाव, ज्येष्ठ अभिनेते डॉ. श्रीराम लागू, विख्यात शास्त्रज्ञ डॉ. रघुनाथ माशेलकर, डॉ. शां. ब. मुजुमदार, डॉ. रा. चिं.ढेरे, डॉ. ह. वि. सरदेसाई, श्रीमती निर्मलाताई पुरंदरे, श्री. सुधीर गाडगीळ, डॉ. सायरस पूनावाला, श्री. प्रतापराव पवार, श्री. भाई वैद्य आणि गेल्या वर्षी डॉ. के. एच. संचेती यांना या पुरस्काराने सन्मानित करण्यात आले आहे.
राष्ट्रपती श्री. प्रणब मुखर्जी, माजी राष्ट्रपती डॉ.ए.पी.जे.अब्दुल कलाम, उपराष्ट्रपती मा. श्री.हमीद अन्सारी, माजी पंतप्रधान अटलबिहारी वाजपेयी, माजी सभापती श्री.सोमनाथ चटर्जी, श्री. मनोहर जोशी, श्री. शरद पवार, स्वरसम्राज्ञी लता मंगेशकर, क्रिकेटपटू कपिलदेव व सचिन तेंडूलकर, परमपूज्य पांडुरंगशास्त्री आठवले, माजी मुख्यमंत्री विलासराव देशमुख, ज्येष्ठ अभिनेते दिलीपकुमार, मा. वसंतराव साठे, कै. नानासाहेब गोरे, तत्कालीन राज्यपाल सी.सुब्रह्मण्यम्, कै. मधु दंडवते, दि हिंदू चे संस्थापक-संपादक एन.राम, न्यायमूर्ती चंद्रशेखर धर्माधिकारी, श्री. सुशिलकुमार शिंदे, सी.पी.आय.(एम)जनरल सेक्रेटरी मा.श्री.सिताराम येचुरी, नाट्यदिग्दर्शक श्री.गिरीश कर्नाड, ज्येष्ठ साहित्यिक डॉ.एस.एल.भैरप्पा, प्रसिद्ध नाटककार श्री. महेश एलकुंचवार, मा. श्री. पृथ्वीराज चव्हाण, डॉ. विकास आमटे, आशा भोसले, श्री. नारायणमूर्ती, श्री. शरद यादव, केंद्रिय मंत्री श्री. नितीन गडकरी आदि मान्यवरांनी पुण्यभूषण पुरस्कार प्रदान करून नामांकित पुणेकरांचा सन्मान केला आहे.
