पुणे दि.२४-समाज कल्याण विभागातर्फे समाजमंदिरामध्ये पुस्तक पुरवठा प्रकरणी पुरवठा धारकास अद्याप कोणताही निधी दिलेला नाही. शासनाचे आदेश येईपर्यंत योजनेस स्थगिती देण्यात आलेली असून या प्रकरणी त्रिसदस्यीय चौकशी समिती गठीत करण्यात आली असल्याचे स्पष्टिकरण सहाय्यक आयुक्त समाज कल्याण कार्यालयातर्फे करण्यात आले आहे.
भारतरत्न डॉ. बाबासाहेब आंबेडकर सामाजिक विकास योजनेंतर्गत महाराष्ट्रातील सर्व समाज मंदिरांच्या व ग्रामपंचायतीच्या ग्रंथालयासाठी पुस्तक खरेदीकरीता यादीसह प्रति जिल्हा १ कोटी या प्रमाणे ३६ जिल्ह्यांसाठी ३६ कोटी या प्रमाणात तरतूद वितरणास शासनाने मान्यता दिली आहे.
शासनाने पुस्तकांची यादी समाज कल्याण आयुक्तालयास दिली. या यादीप्रमाणे पुस्तकांच्या निवडीसाठी तज्ज्ञांची त्रिसदस्यीय निवड समिती गठीत करण्यात आली. शासनाच्या जेम्स पोर्टलद्वारे प्राप्त निविदाधारकांपैकी मे. शब्दालय, पब्लिकेशन हाऊस अहमदनगर यांची निवीदा रक्कम सर्वात कमी असल्याने सदर निवीदाधारकाच्या न्युनतम दरास पुस्तक पुरवठासाठीच्या प्राप्त तरतुदीस खर्च करण्यास शासनाने मान्यता दिली आहे.
सदर प्रक्रीया अधिक पारदर्शी पध्दतीने पार पाडावी यासाठी भारतरत्न डॉ. बाबासाहेब आंबेडकर सामाजिक विकास योजनेंतर्गत पुस्तक पुरवठाबाबत शासनाच्या आदेशानुसार एकच सहायक आयुक्त म्हणून सहायक आयुक्त समाज कल्याण सोलापुर यांना आहरण व संवितरणाचे अधिकार प्रदान करण्यात आले.
पुस्तक पुरवठाबाबत विविध माध्यमांमध्ये पुस्तकांच्या किंमती अवाजवी स्वरुपाच्या असल्याबाबत व त्या अनुषंगीक इतर बाबतीत बातम्या प्रसारीत होत असल्याने समाजकल्याण आयुक्त यांनी ५ डिसेंबर २०२२ रोजी पुरवठाधारकांस कोणत्याही देयकांची अदायगी न करण्याचे आदेश दिले. तसेच याबाबत शासनाचे आदेश येईपर्यंत स्थगिती देण्यात आलेली असून सदर प्रकरणी त्रिसदस्यीय चौकशी समिती गठीत करण्यात आली आहे.
पुस्तक संच पुरवठा प्रक्रीया अद्याप पुर्ण झालेली नाही. सद्यस्थितीत मे. शब्दालय पब्लिकेशन हाऊस अहमदनगर यांनी आयुक्त समाज कल्याण यांनी पुस्तक पुरवठ्यास दिलेल्या स्थगिती आदेशाविरुद्ध उच्च न्यायालय मुंबई येथे याचिका दाखल केलेली असून सध्या प्रकरण न्यायप्रविष्ठ आहे, असे सहायक आयुक्त कार्यालयाने कळविले आहे.
