पुणे-निवडणुकीच्या तोंडावर माझ्या विरोधात प्रचंड मोठे राजकीय षडयंत्र गेल्या वर्षापासून सुरू असून, पोलिसांनी माझ्यावर खोटा गुन्हा दाखल केल्याचे सांगत गुन्हा सिद्ध झाला तर मी राजकीय संन्यास घेईल असे भाजप आमदार आणि भाजयुमोचे प्रदेशाध्यक्ष आणि आमदार योगेश टिळेकर यांनी मायमराठी शी बोलताना म्हटलं आहे.दरम्यान त्यांनी महापालिका आवारात संध्याकाळी उशिरा येवून काही माध्यमांशी संवाद हि साधला .तेव्हा हि पोलिसांच्या कारवाईबाबत संशय व्यक्त केला.आजपर्यंत कॉंग्रेस आणि राष्ट्रवादीचे नेते हे राजकीय रोषातून पोलीस कारवाया करत असल्याचा आरोप करत आलेत .आता खुद्द भाजप आमदाराने हा आरोप केला आहे.
मतदार संघात फायबर ऑप्टीकलचे कामे करताना धमकी आणि त्रास देवुन दि. 7 सप्टेंबर रोजी सकाळी फोनव्दारे 50 लाखाच्या खंडणीची मागणी केल्याप्रकरणी कोंढवा पोलिस ठाण्यात भाजपचे आमदार योगेश टिळेकर, त्यांचा भाऊ चेतन टिळेकर आणि गणेश कामठे यांच्याविरूध्द खंडणीचा गुन्हा दाखल करण्यात आला आहे.
माझ्यावर दाखल झालेला गुन्हा हा राजकीय षडयंत्राचा भाग असून यात पोलिसांची भूमिकाही संशयास्पद आहे. याप्रकरणात मी मदतीच्या हेतूने मध्यस्थी करण्याचा प्रयत्न केला, असे टिळेकर म्हणाले. दरम्यान, पोलिसांच्या संशयास्पद भूमिकेसंदर्भात मुख्यमंत्र्यांची भेट घेणार असल्याचेही टिळेकर यांनी सांगितले.
आमदार टिळेकर यांच्यावर रविंद्र लक्ष्मण बराटे (55, रा. सरगम सोसायटी, धनकवडी) यांनी याप्रकरणी फिर्याद दिली आहे. त्यानुसार पोलिसांनी कलम 385,379,427, 34 प्रमाणे गुन्हा दाखल केला आहे.
7 ऑगस्ट ते 7 सप्टेंबर दरम्यान कात्रज कोंढवा रोड या भागात फिर्यादीच्या कंपनीचे फायबर ऑप्टीक केबलचे काम चालु असताना आमदार योगेश टिळेकर, त्यांचा भाऊ चेतन टिळेकर आणि त्यांचा हस्तक गणेश कामठे यांनी वारंवार फोन करून व समक्ष भेटून त्यांच्या मतदार संघात फायबर ऑप्टीकचे काम करण्यासाठी वायर तोडणे, चोरून नेणे, धमकी देणे तसेच इत्यादी प्रकारे त्रास दिला, त्यांनी 7 सप्टेंबर रोजी फोनव्दारे 50 लाखाची खंडणी मागितली अशी तक्रार आहे.
फिर्यादी हे इ व्हीजन टेलि इन्ट्रा प्रा.लि. (मेंहदळे गॅरेज, एरंडवणा) येथे नोकरीस असुन ते पुणे शहरातील दक्षिण विभागात एरिया मॅनेजर म्हणुन काम करतात. कंपनीतर्फे शहरातील विविध पोलिस पोलिस ठाण्याचे इंटरनेट फायबर ऑप्टीक केबल मार्फत जोडण्याचे तसेच खासगी व्यक्ती व आय टी आय पार्क यांना शुल्क आकारून सेवा पुरविण्याचे काम केले जाते.
दरम्यान, गुन्हयाचा पुढील तपास कोंढवा पोलिस करीत आहेत.
