पीएमआरडीएकडून वाघोली पाणीपुरवठा निविदा प्रकाशित

पुणे-हवेली तालुक्यातील वाघोलीचे झपाट्याने होणारे नागरीकरण व गृहप्रकल्प पाहता सध्या
अस्तित्वात असलेला पाणीपुरवठा अपुरा पडत असल्याने पुणे महानगर प्रदेश विकास प्राधिकरणा
(पीएमआरडीए)च्यावतीने नवीन योजना हाती घेऊन राबविण्यात येणाऱ्या वाढीव पाच एमएलडी (दशलक्ष
लीटर )पाणी पुरवठा जलशुद्धीकरण केंद्राची निविदा प्रसिद्ध करण्यात आली आहे.
वढू बंधाऱ्यापासून वाघोली गावाचे अंतर १२.५ किमी आहे. भीमा नदीवरील वढू बंधारामधून
पाणीपुरवठ्यासाठी पाणी उचलण्यात येणार आहे. वाघोली पाणीपुरवठा योजना प्रकल्पासाठी २३.१० कोटी
रुपये खर्च येणार आहे. सध्याच्या योजनेत इनटेक वेल, कनेक्टिंग पाईप, जैक वेल, पंप हाउस, अशुद्ध पाणी
ऊर्ध्वनलिका २५० मिमी व्यासाची आहे. सध्या वाघोली पाणीपुरवठा योजना २.२ एमएलडी क्षमतेची आहे.
त्यासाठी अस्तित्वातील योजनेची पाणीक्षमता वाढविण्यासाठी नवीन पंप टाकून पंपिग तास वाढवून २० तास
करण्याचे प्रस्तावित आहे. तसेच अस्तित्वातील दाब नलीकेमधून १.४६ एमएलडी वाढीव पाणी पुरवठा
उपलब्ध करण्यात येत आहे. तसेच अस्तित्वात असलेल्या विहिरीवरून अशुद्ध पाणी पंपिग मशिनरी बदलून
त्यासाठी वेगळी दाबनलिका टाकून ०.५ एमएलडी पाणीपुरवठा वाढविण्याचे काम प्रस्तावित आहे.
सदरची योजना १२ तास पाणी उपसा होईल अशा पद्धतीची आहे. वाघोली गाव टेकडीच्या बाजूला असलेल्या
गट नं ८६४ या ठिकाणी जलशुद्धीकरण केंद्र होणार आहे. सदर पाणीपुरवठा योजनेतून आव्हाळवाडी
गावासाठी पाणी पुरवठा होणार आहे.
पीएमआरडीएचे  आयुक्त किरण गित्ते यांनी सांगितले की, वाघोली पाणीपुरवठा सुरळीतरीत्या पार
पडण्यासाठी आम्ही कटीबद्ध आहोत. निविदा प्रक्रिया प्रभावीपणे व जलदगतीने राबविली जाणार आहे.
वाघोली परिसराची सध्य लोकसंख्या १ लाख १५ हजार आहे. सन २०२१ चा विचार करता ही लोकसंख्या ६
लाख ३४ हजार इतकी होईल. याकरिता पाणी पुरवठा क्षमता वाढविणे गरजेचे होते. या पाणी पुरवठा
योजनेमुळे वाघोली परिसरातील टंचाईच्या समस्येवर मात केली जाईल.