संचालक शंकर पवार यांच्या पुढे प्रश्न
पुणे-पीएमपीएल च्या रोजंदारीवर काम करणाऱ्या २१०० चालक, वाहक आणि अन्य बदली कामगारांना एप्रिल महिन्याचे वेतन देण्यात आलेले नाही. त्यामुळे कर्मचाऱ्यांपुढे आर्थिक संकट उभे राहिले आहे. त्यांच्या साठी आपण काय नियोजन करावे याबाबत प्रशासनासह संचालक शंकर पवार यांच्या पुढे प्रश्न निर्माण झाला आहे करोनाच्या पार्श्वभूमीवर गेल्या दीड महिन्यापासून पीएमपीची प्रवासी सेवा बंद ठेवण्यात आली असून, पीएमपीला मोठा आर्थिक फटका सहन करावा लागत आहे. या परिस्थितीतून बाहेर निघण्यासाठी, खर्च बचत आणि उत्पन्न वाढ यावर लक्ष केंद्रित करण्याचा निर्णय प्रशासनाने घेतला आहे. पीएमपीच्या ताफ्यात २१०० कर्मचारी रोजंदारीवर काम करतात. या कर्मचाऱ्यांना लॉकडाउनपासून काम देण्यात आलेले नाही. काम न दिल्याने पीएमपी प्रशासनाने त्या कर्मचाऱ्यांचे वेतन दिलेले नाही.
महामंडळाची आर्थिक स्थिती सध्या बिकट आहे. या परिस्थितीतून बाहेर पडण्याचे मोठे आव्हान पीएमपी प्रशासनासमोर आहे. सद्य परिस्थितीत रोजंदारीवरील कर्मचाऱ्यांना मार्च महिन्याचे वेतन देण्यात आले आहे. मात्र, एप्रिल महिन्यात त्यांचे वेतन देण्यात आलेले नाही; तसेच याबाबत कामगार आयुक्तांकडून मार्गदर्शन मागितलेले आहे, अशी माहिती पीएमपीचे सहव्यवस्थाकीय संचालक अजय चारठाणकर यांनी दिली.
