पुणे -आम आदमी पक्षाच्या प्रयत्नामुळे आज PMPML कंत्राटी सुरक्षाकांना बोनस मिळाला आहे. अशी माहिती आपचे प्रवक्ते डॉ . अभिजित मोरे यांनी येथे दिली. पुणे मनपातील ८००० हून अधिक कंत्राटी कामगारांना ८.३३% बोनस, ५% घरभाडे भत्ता, ५% रजा वेतन कायद्यानुसार देणे आवश्यक असतानाही गेल्या काही वर्षात पुणे मनपाने नियमबाह्य पद्धतीने ते दिलेले नाही. याबाबत आम आदमी पार्टी सातत्याने पाठपुरावा करत आहे.असेही ते म्हणाले.
दिनांक २० ऑक्टोबर रोजी आम आदमी पक्षाच्या शिष्टमंडळाने पीएमपीएलचे व्यवस्थापकीय संचालक बकोरिया यांची भेट घेतली होती व त्यांना शासन नियमाप्रमाणे कंत्राटी सुरक्षा रक्षकांना सुद्धा बोनस मिळण्याचा अधिकार असून कायम सेवकांप्रमाणे त्यांना सुद्धा मिळण्यासाठी संबंधित ठेकेदाराला तसे आदेश देण्याची विनंती केली होती. या शिष्टमंडळात आपचे डॉ अभिजीत मोरे, घनश्याम मारणे, कुमार धोंगडे, रविराज डोंगरे, अमोल मोरे यांचा समावेश होता.
या आम आदमी पक्षाच्या विनंतीचा सकारात्मक विचार करून संबंधित ठेकेदाराला बोनस देण्यासाठी अधिकाऱ्यांनी पत्रव्यवहार केला होता. आम आदमी पक्षाच्या प्रयत्नामुळे आज PMPML कंत्राटी सुरक्षाकांना बोनस मिळाला. सर्वसामान्य कंत्राटी सुरक्षा रक्षकांच्या घरी आनंदाचे वातावरण त्यामुळे तयार झाले आहे.
