पुणे-वादग्रस्त अधिकारी तुकाराम मुंढे यांची नाशिकच्या आयुक्तपदी बदली झाल्यांनतर पीएपीएमएलच्या अध्यक्ष व व्यवस्थापकीय संचालकपदी नयना गुंडे यांची राज्य शासनाने नियुक्ती केली होती. त्यानुसार नयना गुंडे यांनी आज पीएमपीएमएलच्या अध्यक्षपदाचा आणि व्यवस्थापकीय संचालकपदाचा पदभार स्वीकारला.नयना गुंडे यापूर्वी वर्धा जिल्हा परिषदेच्या मुख्य कार्यकारी अधिकारी या पदावर कार्यरत होत्या.
तुकाराम मुंढेंची अवघ्या दहा महिन्याच्या कालावधीनंतर नाशिकच्या आयुक्तपदी बदली करण्यात आली. आपल्या अल्पशा काळात त्यांनी अधिकारी आणि कर्मचा-यांवर शिस्तीचा बडगा उगारला होता. अनेक कर्मचा-यांना घरचा रस्ता दाखवला होता. त्यामुळे पीएमपीएमएल कर्मचा-यांमध्ये प्रचंड नाराजी पसरली होती. त्यामुळे काही कामगार संघटनांनी त्यांच्या बदलीची मागणी केली होती.
दरम्यान, पीएमपीएमएलच्या स्थापनेनंतर पहिल्यांदाच आराखडा तयार झाल्याने त्याची प्रभाविपणे अंमलबजावणी करण्याचे आवाहन नयना गुंडे यांच्यासमोर आहे. पुणे आणि पिंपरी-चिंचवड या दोन्ही महापालिकांशी समन्वय साधत प्रवाशांना आवश्यक सोई-सुविधा पुरवणे, बीआरटी, आयटीएमएस आणि इतर यंत्रणा प्रभावीपणे राबवणे, तोटा कमी करणे अशा विविध आघाड्यांवर गुंडे यांना काम करावे लागणार आहे.
