पुणे-बहुचर्चित पुणे महापालिका महत्त्वाकांक्षी चोवीस तास पाणीपुरवठा योजनाला स्थायी समितीच्या बैठकीत मंजुरी देण्यात आली. या योजनेला मंजुरी मिळाल्यानंतर भाजप कार्यकर्त्यांनी पालिका आवारात फटाके वाजवून आनंद व्यक्त केला.स्थायी समिती अध्यक्ष मुरलीधर मोहोळ यांनी आपल्या कारकीर्दीतच या महत्वाच्या प्रकल्पाच्या कामाला प्रारंभ करण्यास यश मिळाल्याबद्दल आनंद व्यक्त केला
पुणे महापालिकेच्या वतीने शहराला 24 तास समान पाणीपुरवठा करण्यासाठी योजना राबविण्यात येत आहे. त्यामधील 245 कोटी खर्चाच्या पाणी टाक्यांच्या कामास सुरूवात झाली आहे. मात्र, जलवाहिनीच्या कामासाठी 26 टक्के वाढीव दराने निविदा आल्याने त्या वादग्रस्त ठरल्या. त्यामुळे प्रशासनाने या निविदा रद्द करून जवळपास दोन हजार 315 कोटींच्या जलवाहिन्यांच्या कामासह पाणी मीटर, जलशुध्दीकरण केंद्रातील कामे आणि या योजनेची दहा वर्षांची देखभाल दुरुस्ती अशा सर्व कामांसाठी एकत्रित निविदा प्रक्रिया राबविली होती. शहराला चोवीस तास पाणीपुरवठा योजनेतील जलवाहिनी, केबल डक्ट, पाणी मीटर आणि मेन्टनन्सच्या कामाच्या सहा पैकी पाच कामे एल अँड टी ला तर एक काम जैन एरिगेशनला देण्यास स्थायी समितीच्या बैठकीत मान्यता देण्यात आली. यामुळे आता पुणेकरांना २४ तास समान पाणीपुरवठा मिळण्याचा मार्ग मोकळा झाला आहे.चोवीस तास पाणीपुरवठा योजनेसाठी पालिकेने सहा पॅकेजमध्ये निविदा मागविल्या होत्या. सुमारे २३१५ कोटी रुपयांच्या या निविदा सरासरी ११ टक्के कमी दराने आल्या असून महापालिकेला २०५० कोटी रुपये मोजावे लागणार आहेत. सहा पॅकेजमध्ये ‘एल अँड टी’ कंपनीची सर्वात कमी निविदा आली आहे. त्यामुळे हे काम याच कंपनीला मिळणार हे निश्चित होते. परंतु महापालिकेच्या निविदा प्रक्रियेच्या संकेतानुसार कोणत्याही मोठ्या प्रकल्पाचे काम एकाच कंपनीला दिल्यास त्या कंपनीच्या कारभारात एकाधिकारशाही निर्माण होते. प्रसंगी बदलत्या परिस्थितीनुसार कंपनी स्वत: च्या मागण्या रेटून नेत त्यांना हवे ते निर्णय घेऊ शकते. किंबहुना कामही अर्धवट ठेऊ शकते. असे झाल्यास प्रकल्प बंद पडणे अथवा रेंगाळू शकतो. त्यामुळे एखाद दुसऱ्या प्रकल्पाचे काम सेकंड लोएस्ट निविदा भरलेल्या कंपनीला देण्यात येते. त्यानुसार एका कामाची निविदा जैन एरिगेशनला देण्यात आली आहे.
पहा आणि ऐका याबाबत स्थायी समिती अध्यक्ष मुरलीधर मोहोळ काय म्हणाले …
