पुणे-बाबासाहेब पुरंदरे यांच्या शिवसृष्टी ला तात्काळ शेकडो कोटि देणाऱ्या भारतीय जनता पक्षाने महापालिकेच्या वतीने होणाऱ्या शिवसृष्टी चे काय केले? आणि या शिवसृष्टीसाठी फेटे घालून लाखो पेढे वाटन्याची घोषणा करणारे भाजपाने कसे डावलले ? शिव सृष्टी साठी आंदोलने करू पहाणाऱ्या विरोधी नगरसेवकांचे भाजपाने काय केले ?असा सवाल करून पुणे महापालिकेतील ‘महाशिवआघाडी’ने भाजप खोटारडेपणा करीत असल्याची जोरदार टीका केली. तत्कालीन मुख्यमंत्री देवेंद्र फडणवीस यांनी शिवसृष्टी साकारण्याचा दिलेला शब्द पाळला नसला, तरी शिवसेनेचा आगामी मुख्यमंत्री ही शिवसृष्टी साकारेल, असा दावा काँग्रेसने केला. भाजपनेही या टीकेला उत्तर देऊन भाजपचेच भावी मुख्यमंत्री फडणवीस शिवसृष्टी साकारतील, असे उत्तर देत वेळ मारून नेली. राज्यातील संभाव्य राजकीय समीकरणांची झलक या निमित्ताने पुण्यात पाहावयास मिळाली.
भाजपने यंदा अर्थसंकल्पात शिवसृष्टीसाठी दहा कोटी आणि बालगंधर्व रंगमंदिराच्या पुनर्विकासासासाठी पाच कोटी अशी १५ कोटी रुपयांची तरतूद केली होती. मात्र प्रशासनाने हे पैसे या कामासाठी वापरलेच नाहीत.म्हणून
हा निधी शहरी गरीब योजनेसाठी वळविण्याच्या प्रस्तावातील 10 कोटी वळविन्यास काँग्रेस ने तीव्र हरकत घेतली, सुनील कांबळे आणि धीरज घाटे यांनी हा प्रस्ताव गरीबांच्या हिताचा असल्याने त्यास विरोध करने चुकीचे असल्याचा पवित्रा घेवून काही विधाने केल्याने महापालिकेच्या मुख्यसभेत या प्रस्तावावर ‘महाशिवआघाडी’ आणि भाजपमध्ये यांच्यात जोरदार खडाजंगी झाली. निधी वर्गीकरणाच्या विषयावरील चर्चेला काँग्रेसचे गटनेते अरविंद शिंदे ,अविनाश बागवे, अजित दरेकर,यांनी तोंड फोडले. शिवसृष्टी करायचीच नाही, हा भाजपचा पहिल्यापासूनच गनिमी कावा होता. या प्रस्तावाच्या निमित्ताने भाजपच्या मनुसब्यांना उघडे पाडण्याची संधी मिळाल्याची टीका त्यांनी केली. भाजपने या विषयावर २००२ मध्ये सभागृहात ‘धिंगाणा’ घातल्याची आठवणही त्यांनी करून दिली.
भाजपने गेल्या २७ महिन्यांपासून शिवसृष्टीचा विषय जाणीवपूर्वक प्रलंबित ठेवला आहे. फडणवीस यांनी बैठकीत मोठा गाजावाजा केला. मात्र, त्याच वेळी येथे पैसे न देता शिवशाहीर बाबासाहेब पुरंदरे साकारत असलेल्या शिवसृष्टीला पैसे दिले. भाजपला कोथरूड येथे कधीही शिवसृष्टी साकारायची नव्हती. त्यांनी केवळ राजकारण केले आणि तोच बुरखा फाडण्याची ही वेळ असल्याची टीका शिंदे यांनी या वेळी केली. ‘शिवसेनेचे गटनेते पृथ्वीराज सुतार यांनीही शिवसृष्टीच्या निधीचे वर्गीकरण करू नका,’ असा इशारा दिला. अजित दरेकर यांनी ‘छत्रपती शिवाजी महाराज हे आपले दैवत असून विनाकारण वातावरण खराब करू नका,’ असे बजाविले. सुभाष जगताप, भय्यासाहेब जाधव, विरोधी पक्षनेते दिलीप बराटे यांनीही भाजपला धारेवर धरले.
भाजपचे नगरसेवक धीरज घाटे यांनी ‘शहरी गरीबसारख्या योजनेचा निधी थांबवू नका. गोरगरीब रुग्णांचे हाल होत आहेत,’ असा दावा केला आणि हे वर्गीकरण करण्याचा सल्ला या वेळी दिला. स्थायी समितीचे अध्यक्ष सुनील कांबळे यांनी केलेल्या वैयक्तिक टीकेनंतर त्यांची आणि शिंदे यांच्यात चांगलीच जुंपली. अखेर सभागृह नेते श्रीनाथ भिमाले यांनी वातावरण शांत करत मध्यम मार्ग काढण्याची विनंती केली. शिंदे यांनी ‘शिवसेनेचे आगामी मुख्यमंत्री शिवसृष्टी साकारतील,’ अशी फोडणी या चर्चेला दिली. त्यावर घाटे यांनी ‘भावी मुख्यमंत्री फडणवीसच हा प्रकल्प मार्गी लावतील,’ असा चिमटा ‘महाशिवआघाडी’ला काढला.
महाशिवआघाडीने ‘शिवसृष्टी’चा निधी वळविण्यास केलेल्या विरोधानंतर सभागृहाने एकमताने महापालिका आयुक्तांना इतर निधीतून पैसे घेण्याचे अधिकार उपसूचनेद्वारे प्रदान केले आणि या विषयावर पडदा पाडला. मात्र, त्याच वेळी याच प्रस्तावात नमूद असलेल्या बालगंधर्व रंगमंदिराच्या पुनर्विकासासाठी ठेवलेला 5 कोटिचा निधि वळविन्यास मात्र मान्यता देण्यात आली. यावळविण्यात आलेल्या निधीबद्दल कोणीही चकार शब्द काढला नाही. बालगंधर्व रंगमंदिराचा पुनर्विकास करायचा की नाही, याची विचारणाही कोणी केली नाही.
