पुणे, दि. 4 मे : प्लास्टिक बंदीसाठीच्या कारवाईने पुन्हा एकदा डोकं वर काढले असून शहरात आज महापालिकेकडून दुकानदारांवर कारवाई करण्यात आली. परंतु, ही कारवाई बेकायदेशीर असून दंड वसूल करण्याच्या हेतुने प्रेरित होती, असा आरोप पुणे जिल्हा रिटेल व्यापारी संघाच्या वतीने करण्यात आला आहे. तसेच, या कारवाईचा आम्ही जाहीर निषेध करीत असल्याचे संघटनेचे अध्यक्ष सचिन निवंगुणे यांनी सांगितले.
शहरातील कात्रज, धनकवडी, चंदननगर, सिंहगड रस्ता परिसरातील दुकानदारांवर प्लास्टिक बंदीबाबत कारवाई करण्यात आल्याची माहिती निवंगुणे यांनी दिली. ते म्हणाले की, प्लास्टिक पिशव्यांचा वापर किरकोळ दुकानदारांकडून कमी झाला आहे. मात्र, रस्त्यावरील विक्रेत्यांकडून त्याचा वापर होत आहे. असे असताना महापालिकेकडून केवळ दंडाची रक्कम गोळा करण्याच्या हेतुनेच किरकोळ दुकानदारांना लक्ष्य केले जात आहे. चुकीच्या पद्धतीने व्यवसाय करणाऱ्यांवर जरुर कारवाई करावी परंतु बेकायदेशीरपणे अन्यायकारक कारवाईस आमचा विरोध आहे.
बिबवेवाडीतील एका दुकानदारांवर कारवाई करताना त्याचा वजनकाटा जप्त करण्यात आला. हे कोणत्या कायद्यात बसते असा सवालही व्यापारी विचारत आहेत. संघटनेच्या पातळीवर प्लास्टिक बंदीबाबत जागृती करीत असतानाच त्याचा पूनर्वापर व त्यापासून वस्तू तयार करण्याचे काम सुरु आहे. सकारात्मक भूमिकेत किरकोळ व्यापारी व दुकानदार असताना त्यांच्यावर अशा प्रकारे चुकीची कारवाई होऊ नये हीच अपेक्षा आहे, असेही निवंगुणे म्हणाले.
