पुणे-पीएमपीएलच्या स्मार्ट एअरपोर्ट बस सेवाचा प्रवाशांनी लाभ घ्यावा असे आवाहन खा.गिरीश बापट यांनी येथे केले आहे.
ते हणाले ,’पु ण्यामध्ये पीएमपीएलच्या माध्यमातून एअरपोर्ट करिता आगळी-वेगळी जलद व स्वस्त स्मार्ट एअरपोर्ट बस सेवा प्रवाशांना उपलब्ध होण्याच्या दृष्टिकोनातून मी पीएमपीएलचे व्यवस्थापकीय संचालक यांच्याकडे सूचना केली होती. त्याचा विचार करून पीएमपीएलने स्मार्ट सिटी मध्ये उपलब्ध असलेला निधी व मागील वर्षी पीएमपीएल मध्ये दाखल झालेल्या अत्याधुनिक इलेक्ट्रीक बस यांचा वापर करून लोहगाव विमानतळ येथून बस सेवेचा शुभारंभ आज माझ्या हस्ते पहिल्या टप्प्यात ए-१ हिंजवडी, ए-२ हडपसर, ए-३ स्वारगेट, ए-४ कोथरूड, ए-५ निगडी या पाच मार्गावर सुरू करण्यात आली आहे. मागील काळात दोन वेळा अशा प्रकारची सेवा सुरू करण्यात आली होती. त्यासेवेतील काही त्रुटी- उणिवा दूर करून नव्याने ही सेवा नागरिकांकरिता विमानतळाच्या आगमन परिसरा जवळ उपलब्ध करून देण्यात आली आहे. तसेच प्रवाशांना विमानतळाबाहेर अशा प्रकारची सेवा उपलब्ध आहे याची इत्यंभूत माहिती सूचना फलकाद्वारे उपलब्ध करून देण्यात आलेली आहे. पहिल्या टप्प्यात ए-१ हिंजवडी, ए-२ हडपसर, ए-३ स्वारगेट, ए-४ कोथरूड, ए-५ निगडी या मार्गावर दर तीस मिनिटाला बस उपलब्ध असणार आहे. यामध्ये मुख्यतः विमानाने येणारे प्रवाशी, शहरातील पंचतारांकित हॉटेल, कॉर्पोरेट समारंभ, आंतराष्ट्रीय बैठका आदी गोष्टींचा विचार करण्यात आला आहे. ही सेवा पूर्ण वातानुकूलित असली तरी यामध्ये बस कुठे व कोणत्या वेळेला आहे ही माहिती प्रवाशांना मिळण्याकरिता ॲपची सुविधा देण्यात आलेली आहे. सध्या शहरातील पाच मार्गावर सुरू असणारे सेवा पुढील काळात विमानाच्या वाढणाऱ्या संख्येप्रमाणे वाढविण्यात येणार आहे.
यावेळी महापौर मुरलीधर मोहोळ, पिंपरी चिंचवडच्या महापौर माई ढोरे, पिंपरी चिंचवड महानगरपालिका स्थायी समिती अध्यक्ष, आमदार माधुरी मिसाळ, नगरसेवक सिद्धार्थ धेंडे, माजी नगरसेवक प्रशांत बधे, विमानतळ प्राधिकरण सल्लागार समितीचे सदस्य उज्वल केसकर, कवी बादशाह सय्यद, अनिल पाटील, संचालक कुलदीप सिंग, पीएमपीएलचे सीएमडी ,स्मार्ट सिटीचे मुख्य कार्यकारी अधिकारी आदी अधिकारी व पदाधिकारी उपस्थित होते.
