तुळजापूर-श्री तुळजाभवानी देवीच्या मंदिरात अंगप्रदर्शक कपडे परिधान करून येणाऱ्या भाविकांना प्रवेश बंद करण्याचा निर्णय मंदिर प्रशासनाने घेतला होता. पण प्रशासनाने अवघ्या काही तासांतच हा निर्णय मागे घेतला.श्री तुळजाभवानी देवीच्या मंदिरामध्ये अंगप्रदर्शक कपडे परिधान करून येणाऱ्या भाविकांना ‘ नो एन्ट्री’ करण्यात आली होती. यासंबंधीच्या नोटीसीचे फलक मंदिर परिसरात ठिकठिकाणी लावण्यात आले होते. देवीच्या दर्शनासाठी देशविदेशातून भाविक येतात. भाविकांनी दर्शनाला येताना कोणते कपडे परिधान करावेत यासंबंधीचा कोणताही नियम आजतागायत अस्तित्वात नव्हता. पण मंदिर प्रशासनाने बुधवारी एका नोटीसीद्वारे अंगप्रदर्शक कपडे घालून दर्शनासाठी येण्यास मनाई केली.
‘जे भाविक अंग प्रदर्शक, उत्तेजक, असभ्य, अशोभनीय (वेस्टर्न) तसेच हाफ पॅन्ट व बर्मुडा परिधान करून येतील, त्यांना श्री तुळजाभवानी देवीच्या दर्शनासाठी मंदिरात प्रवेश दिला जाणार नाही,’ असे या नोटीसीत नमूद करण्यात आले होते. या आदेशांची गुरुवारपासून प्रत्यक्ष अंमलबजावणीही सुरू झाली होती. पण या प्रकरणी चौफेर टीकेची झोड उठल्यामुळे प्रशासनाला आपला निर्णय मागे घ्यावा लागला.
मंदिराची शालीनता अबाधित राखण्यासाठी भाविकांना अंगप्रदर्शक कपडे घालून न येण्यासंबंधीचा एक तोंडी निर्णय घेण्यात आला होता. पण रेकॉर्डवर असा कोणताही निर्णय नसल्याचे लक्षात आल्यानंतर असे कोणतेही निर्बंध लागू नसल्याचे प्रगटन आम्ही काढले, असे तहसीलदार तथा मंदिर व्यवस्थापक सौदागर तांदळे यांनी गुरुवारी रात्री उशिरा स्पष्ट केले.
मंदिरात येताना भाविकांचा ड्रेसकोड काय असावा, याविषयी भाविकांना आवाहन करणारे असे फलक मंदिर परिसरात लावण्यात आले होते.
