पुणे :
शहरात ज्या ठिकाणी वारंवार कचरा टाकला जातो, असे शहरातील 200 स्पॉटस् निश्चित करण्यात आले असून, आगामी काळात तेथील स्वच्छतेवर महापालिकेतर्फे भर दिला जाणार आहे. कचरा उचलण्यासाठी कचर्याच्या गाड्यांचे निश्चित वेळापत्रक तयार करून या प्रक्रियेमध्ये सुलभता आणण्याचा प्रयत्न केला जाणार आहे. तसेच सार्वजनिक स्वच्छतागृहांचीही देखभाल करण्यासाठी 15 क्षेत्रीय कार्यालयांत प्रत्येकी एक ‘जेट मशिन’ पुरविण्यात येणार आहे. ‘कचरा मुक्त शहर’ आणि ‘स्वच्छ स्वच्छतागृहाचे’ उद्दिष्ट साधण्यासाठी राष्ट्रवादी काँग्रेस या पुढील काळातही पाठपुरावा करणार आहे.
शहरातील प्रमुख रस्ते आणि उपनगरांत अनेक ठिकाणी कचरा साठला आहे. वेळीच तो उचलला जात नाही, त्यामुळे अस्वच्छता निर्माण होऊन शहराच्या प्रतिमेला बाधा पोचत आहे. ही समस्या लक्षात घेऊन राष्ट्रवादी काँग्रेसच्या शहराध्यक्ष आणि खासदार अॅड. वंदना चव्हाण यांनी कचर्याबाबत बैठक घेण्याची विनंती महापौर प्रशांत जगताप यांना केली होती. त्यानुसार गुरुवारी ही बैठक झाली. महापौर प्रशांत जगताप, खासदार वंदना चव्हाण, महापालिकेचे सहआयुक्त आणि घनकचरा व्यवस्थापन विभागाचे प्रमुख सुरेश जगताप, सर्व क्षेत्रीय अधिकारी, संबंधित कर्मचारी, ‘स्वच्छ’ संघटनेचे प्रतिनिधी या बैठकीत उपस्थित होते.
शहरातील कचरा उचलण्याविषयी व त्यावर प्रक्रिया करण्याबाबत महापौरांनी यावेळी विविध सूचना दिल्या.
खासदार चव्हाण म्हणाल्या, ‘वारंवार कचरा साठणार्या ठिकाणांवर लक्ष्य केंद्रीत करून तेथील स्वच्छतेवर भर द्यायला हवा. सार्वजनिक स्वच्छताही महत्त्वाची असून, त्यासाठी महापालिकेने आराखडा तयार करून अंमलबजावणी केली पाहिजे. कचरागाड्यांचे वेळापत्रक तयार करून त्यानुसार कचरा उचलला गेला पाहिजे. हे वेळापत्रक नागरिकांपर्यंत पोहोचले पाहिजे. तसेच कचरा कंटेनरमध्ये न टाकणार्यांवर दंडात्मक कारवाई महापालिकेने करावी. तसेच संबंधित कर्मचार्यांची त्यावर काटेकोर देखरेख राहिल, यासाठी महापालिकेच्या वरिष्ठ अधिकार्यांनी लक्ष देण्याची गरज आहे. तसेच ‘स्वच्छ’च्या कर्मचार्यांनी केवळ कचरा उचलणे अपेक्षित नाही तर, त्या ठिकाणी स्वच्छता राखायची आहे. त्यासाठी त्यांना साधने महापालिकेकडून पुरविली जाईल. या बाबतच्या उपक्रमांत नागरिकांनाही सहभागी करून घेण्यासाठी महापालिकेने प्रयत्न करावेत, अशी सूचना त्यांनी केली. सार्वजनिक स्वच्छतागृहांमध्ये देखभाल होत नसल्याचेही चव्हाण यांनी यावेळी निदर्शनास आणले. त्यासाठी खासगी उद्योग-व्यवसाय समूहांच्या मदतीने स्वच्छतागृहे दत्तक घेऊन त्यांची देखभाल दुरुस्ती करण्यासाठी आपण अधिकचे प्रयत्न सर्वांनी मिळून करायला हवे आहेत. तसेच सार्वजनिक शौचालयांची देखभाल करणार्या लोकांना हाऊस किपिंगचेही प्रशिक्षण देण्यात यावे अशी सूचना चव्हाण यांनी केली.
घनकचरा विभागाचे प्रमुख सुरेश जगताप यांनी, ‘वारंवार कचरा साठतो अशा 200 ठिकाणांचा आराखडा महापालिकेने निश्चित केला आहे. तेथील कचरा उचलण्यासाठी तळातील कर्मचार्यांपासून ते वरिष्ठ अधिकार्यांना पुन्हा सूचना देऊन त्यांच्याकडून अंमलजबावणी केली जाईल असे सांगितले. तसेच स्वच्छतागृहांच्या देखभालीसाठी 15 जेट मशिन लवकरच पुरविण्यात येतील. तसेच उद्योगांच्या सामजिक जबाबदारीच्या जाणिवेतून (सीएसआर) स्वच्छतागृहे दत्तक घेऊन त्यांची देखभाल-दुरुस्ती करण्यात येणार असल्याचेही त्यांनी नमूद केले.
कचरा उचलण्यासाठी ‘स्वच्छ’ची मदत घेण्यात येत आहे. त्यांच्या कचरा वेचकांच्या अडचणींचे निराकरण करण्याचे आश्वासन माधव जगताप यांनी यावेळी दिले.
